Pynthikna u PM Modi ban bishar bniah halor ka jingdawa ILP bad halor ka ktien Khasi, Garo :CM Meghalaya

Syllad | The Rising MeghalayaAugust 9, 2023

U Myntri Rangbah ka Meghalaya u Conrad K Sangma mynta ka sngi balang u pyntip ba na ka liang u Myntri Rangbahduh ka ri u Narendra Modi u la pynthikna ban bishar bniah halor ka mat kaba iadei bad ka jingdawa pyntreikam ia ka Inner Line Permit (ILP), ka jingkynthup ia ka ktien Khasi bad Garo nalor kiwei pat ki mat ba la leit rah da ka kynhun nongmihkhmat na ka jylla.

Haba kren sha ki lad pathai khubor, u Sangma u la ong, “Ngi la iamir jingmut bad pyntip sha u halor ki jingiakren kiba dang iaid shakhmat ha kaba iadei bad ki kam ia pynbeit pud, bad na ka liang u PM u la pynpaw ka jingsngewkhia halor ki jingjia bapher bapher kiba la jia bad ruh balei ba ia kum kine ki mat kiba hapoh u pud u sam jong ka ri ym lah ban weng.

U PM u la ai ruh ka jingiaroh ia ki nongialam ka thain North East halor ka jingshim ia ki sienjam bad ong ruh ba kine ki dei ki jingeh kiba shem shitom, hynrei watla katta ki nongialam jong ki jylla bapher bapher mynta ki la shimkhia halor kane ka bynta. U la pynpaw ruh ka jingkmen halor kane ka bynta bad pynthikna ruh halor baroh ki lad jingkyrshan na ka liang ka sorkar.

Ha kaba iadei bad ka jingiakren iasuk kaba dang iaid shakhmat bad ka seng HNLC, u PM u la pynpaw ia ka jingangnud na ka bynta ban ioh pat ia ka jingsuk kaba neh ha ka jylla Meghalaya bad kyntu ruh ia ka sorkar jylla ban pyniaid shakhmat ia kane ka kam khnang ban lah ban pynkut noh kham kloi.

Halor ka jingpynpaw jong u CM Sangma halor ka jingangnud jong ki paid ka jylla na ka bynta ban kynthup ia ka ktien Khasi bad Garo ha ka khyrnit kaba phra ne Eighth Schedule, na ka liang u PM u la pynpaw ba u sngewthuh halor ki jingeh kiba kum ki nongshong shnong ki iakynduh bad kular ruh ban bishar bniah halor kane ka bynta.

Ha kaba iadei bad ka jingdawa pyntreikam ia ka ILP ha ka jylla, na ka liang u CM Conrad Sangma u la ong ba ka kynhun nongmihkhmat na ka jylla ki la dep ban pynpaw hakhmat u PM halor ka jingangnud jong u paidbah ka jylla na ka bynta ban aijingiada ia  ki trai ri trai muluk.

“Ngi la pyrshang lyngba ka MRSSA ruh. Ngi la pynshai ha u halor  ka MRSSA bad ula shah skhor bha ia ngi bad u sngewthuh ia ka jingsngewkhia jong ki paidbah ka thain Shatei Lam Mihngi bad ula ong ruh ba un sa shong bishar ia kane ka kam bad ba un sa pyntip sha ka sorkar jylla bad pynlong ruh ka jingiakren ruh bad ka tnat kam pohiing.