Pynthud u slap iaka jingialehkai ka Moodymmai vs Young’s Lad haka District Cricket League ka WJHDCA

Syllad | The Rising MeghalayaApril 12, 2025

Ka Moodymmai CC bad ka Young’s Lad CC kila hap ban iasam mar shi point hadien ba u slap uba la wan ther jur ula wanrah iaka jingshlei um ka madan haka jingialehkai District Cricket League kaba pyniaid da ka West Jaintia Hills District Cricket Association (WJHDCA) ha Khliehtyrshi haka 12 tarik Iaiong.

Naduh ka por step la hap ban pynduna iaka over na ka 35 sha ka 28 over namar ka jingpynthud u slap.

Ka Moodymmai kaba liem iaka toss kala tied shuwa bad kamai 107 run bad liem baroh 10 wicket na ka 23.4 over.

Haba poi ka pali jong ka Young’s Lad CC, ha kane ka por ruh u slap ula wan ther jur bad pyndap um smam iaka madan. Kane kala pynlong iaki umpire ban shim iaka rai ban pyndam iaka jingialehkai bad baroh ar ki captain kila mynjur ban iasam mar shi point.

Ka jingialehkai kaba bud kan long haka 14 tarik Iaiong hapdeng ka North East Adventist University (ATS) pyrshah iaka Evergreen SC & CC haka por 9 baje mynstep.