Pynthymmai ka Dorbar Shnong Ratacherra ïaki nongkitkam shnong, u MDC barim kum u Waheh Shnong

Syllad | The Rising MeghalayaJune 17, 2019

KHLIEHRIAT: Ka Dorbar Shnong Ratacherra, East Jaiñtia Hills District haka sngi Nyngkong kala jied ïaki nongkitkam shnong ba thymmai jong ka bad kala pynthymmai ruh ïa u Waheh Shnong kaba baroh shikatta la bat da u Ma Khamsngurbha Pohïing.

Une u Waheh Shnong thymmai u dei u MDC barim ka Narpuh u Ma Desous Pohshna.

U Symbud Waheh Shnong la jied ïa u Ma Faires Pohshna. Nalorkata, la pynthymmai ruh iaki dkhot ka Executive Body ba kynthup ia u Khlur Pohlong kum u Secretary, u Bujli Sumer kum u sAssistant Secretary bad u Stephan Chadong kum u Finance Secretary.

Ka samoi treikam jong ki kan long na ka bynta lai snem.

Ka Dorbar Shnong Ratacherra ka pynpaw ka jingsngewnguh kaba khraw iaka Kong Trophimai Manar ba shong basah ha Mynthong Jowai, kaba la ai sngewbha sha ka Dorbar Shnong iaka jaka ban shna iaka surok kali naduh NH6- haduh Wellington Jungai Secondary School, Ratacherra, la pynkut ka kyrwoh ba la phah da u Waheh Shnong barim u Ma Khamsngurbha Pohiing.