Pyntip ka Congress ba lah ban wan pyniasoh biang u Bah Charles Pyngrope

Syllad | The Rising MeghalayaNovember 29, 2024

Ka liang pyrshah Congress ha ka 29 tarik Naiwieng ka la ai dak ba u State President ka All India Trinamool Congress uba dei ruh u MLA ka Nongthymmai u Bah Charles Pyngrope u lah ban wan pyniasoh biang sha ka party.

Haba kren sha ki lad pathai khubor, u MLA ba marwei na Mylliem uba dei ruh u Chief Whip u Bah Ronnie V Lyngdoh u la ong, “Nga tharai ba kane ka dei ka khubor kaba shai sha ki paidbah ka Jylla. U president ka Meghalaya Trinamool Congress da lade hi kum u president u la pynduh noh ia baroh kawei ka block (Nongthymmai) TMC block bad kyntu ia la ki nongkyrshan jong u ban pyniasoh sha ka Congress, kata hi ka pyni ia ka khubor kaba shai kdar..Dei tang ka seng Congress kaba lah ban ai jingshakri ia ki paidbah nongshong shnong ka Jylla.”

“Ka Trinamool Congress ka la pynduh noh ia ka block jong ka, kata ha kaba u president hi u dei u MLA jong kane ka jaka. Nga tharai ka dei ka khubor kaba paw shai kdar, kam don kano kano ka jingartatien halor kane ka bynta,” u la bynrap.

Haba kylli halor halor ka jinglong la khreh jong ka Congress ban pdiang sngewbha ia u Myntri Rangbah barim u Dr Mukul Sangma sha ka party, u Bah Ronnie u la ong, “Kino kino kiba don ia ka mon ngi pdiang sngewbha ban wan pyniasoh sha ka party Congress. Namar ngi don hangne ym tang na ka bynta ban iakhun elekshon, hynrei ngi don hangne na ka bynta ban ai ka jingshakri ia ki paidbah bad ia ka jylla.”

U Bah Ronnie u la pynpaw ruh ba ki katto katne ngut ki nongthaw ain, kata kumba hynniew haduh phra ngut ki la pynpaw ia ka jingdon mon ban pyniasoh sha ka Congress shwa ka elekshon sha ka iingdorbar thaw ain ha u 2028, kata wat hapdeng ka jingeh kiba mih na ka ain kyntiap seng.

Ha kajuh ka por u Bah Ronnie u la kyntait ia ki khubor hamsaia halor ka jingbym sngewhun ia ka jingialam jong u President ka Meghalaya Pradesh Congress Committee (MPCC) u Bah Vincent H. Pala.