Pyntip u CM ba ka jingiap hapdeng ki longkmie kiba kha khun ka la hiar haduh 40% ha ka Jylla

Syllad | The Rising MeghalayaMarch 11, 2025

U Myntri Rangbah ka jylla u Conrad K Sangma haka 10 tarik Lber u la pyntip ba ka sorkar Jylla ka la lah ban tehlakam ha kaba iadei bad ka jingdon jong ki longkmie kiba khlad ha ka por kha khun ne Maternity Mortality Rate (MMR) da haduh 40 percent.

Haba jubab hapoh ka iingdorbar halor ka mat kaba iadei bad ka jingai shuti na ka bynta ki longkmie ba punkhun, u Conrad u la ong ba ka MMR ka dei kawei na ki mat kaba ka sorkar MDA I ka la shimkhia naduh u snem 2018.

“Ha katei ka por, ka MMR ka long haduh arshah ia ka jinglong jingman hapoh ka ri ha ki hynriew snem kiba la dep. Hynrei, lyngba k jingshimkhia ha ki bynta bapher bapher la lah ban pynhiar arsut ia ka MMR da haduh 40%. Mynta ngi la iaid ha ka jingkhein kyllum ha ka jinglong jingman hapoh ka ri,” u la ong.

Kham hashwa, u CM u la pyntip ba na ka bynta ki nongtrei ba pura ha ka kam sorkar la khmih ia ki hapoh ka Subsidiary Rule 111 jong ka Meghaalya Fundamenta Rules & Subsidiary Rules, 1984 (kumba la pynkylla).

Ki longkmie kiba punkhun ki ioh ia ka shuti kaba 120 sngi, kata kiba don ym duna ia arngut ki khun kiba dang sah. Lada jia ba i khunlung i khlad noh hapoh kpoh lah ban ai shuti shuh shuh ban ia katei kaba la kdew.

Kumba ju long la ai shuti shwa 90 sngi, kata kaba la treikam naduh ka 14 tarik Rymphang 1984 haduh ka 22 tarik Nohprah 2009. Hadien la kyntiew na ka 90 sngi sha ka 120 sngi naduh ka 23 tarik Nohprah 2009 haduh ka 7 tarik Nohprah 2017. Hadien kane la kyntiew biang na ka 120 sngi sha ka 180 sngi kaba la sdang treikam naduh ka 8 tarik Nohprah 2017 ter ter,” u la ong.

Na ka bynta ki karkhana shimet, u CM u la ong ba ki hap hapoh ka jingkhmih jingpyniaid katkum ka Maternity Benefit (Amendment) Act, 2017.

Ka por jong ka jingai shuti ryngkat ka jingsiew tulop ia kiba punkhun ka long naduh 12 taiew haduh 26 taiew. Lah ban kdew ba baroh ki jingtreikam karkhana ba shimet ne kiba pyniaid da ka sorkar ki hap ha katei ka Maternity Benefit Act.

“Yn ym don ki longkmie ba punkhun ki ban ioh ia ka bai kha khun ne Maternity Benefit lymda ka trei ha ki jaka jong ki nongai kam kiba lah ban kam ia ka bai kha khun na ka bynta ka por ka ban ym duna ia ka phra sngi ha ki 12 bnai mardor ka ban long shwa ka tarik ba khmih lynti ban kha ia i khunlung,” u la ong.

Nalor kata u la ong ruh namar ba ki ain ba la don jong ka sorkar kim kynthup ia ki nongtrei ki bym dei pura, casual, contract, adhoc bad muster roll kumta ruh ki lah ban ioh ia ka shuti kha khun hapoh jong ka Maternity Benefit (Amendment) Act 2017, kaba dei ka jingpynkylla thymmai ia ka “The Maternity Benefit Act, 1961.”