Pyntip u CM ba ka Jylla ka la pynkhreh ia ka sorbe thymmai hapoh PMAY-G ban pynioh iing ia kiba duk

Syllad | The Rising MeghalayaDecember 3, 2024

U Myntri Rangbah ka Jylla u Conrad K Sangma ha ka 2 tarik Nohprah u la pynbna ba ka Jylla ka la long kaba la pynkhreh na ka bynta ka sorbe  hapoh ka Pradhan Mantri Awaas Yojana – Gramin (PMAY-G) khnang ban ioh jingkhein halor ka jingdon jong ki longiing baduk bad ban pynshna ia ki iing baduk.

Kane ka la wan long ruh hadien ba la pyndep ban shna i ki map na ka bynta kawei pa kawei ka shnong kiba hakhmat eh ha kaba pynlong ia kane ka sorbe ban pynthymmai ia ka Awaas+ 2018 list ka ban pynthikna halor ka jingpynrung kyrteng ia baroh ki longiing kiba dei hok ban ioh ia ki iing baduk hynrei kiba la shah iehnoh bad khlem shah kynthup ha ki sorbe kiba la dep.

Kane ka sienjam ka la wan long ruh hadien ba ka MoRD, Rural Housing Division ka la pynjlan ia ka PMAY-G sa na ka bynta san snem, kata haduh u snem 2028-29, bad ka Meghalaya kaba la pyndep ia baroh ki thong kiba ladep ban pynioh ia ki iing baduk kan long kawei na ki katto katne ki jylla ki ban pynlong biang ia ka jingleh sorbe.

Naduh ba la sdang pyntreikam ia ka PMAY-G ha u snem 2016, ka Meghalaya ka la mang haduh 186,283 tylli ki iing bad kaba la biang pura ban pyndep katkum ka thong hapoh jong ka Awaas+ survey 2018. Kat haduh mynta haduh 113,158 (60.75%) tylli ki iing la dep ban shna bad kiba sah ki dang don hapdeng ka jingpyntrei. Ka Jylla ka don ia ka jingthmu ban pyndep noh ia baroh ki iing hapoh u bnai Kyllalyngkot 2025.

Ka Jylla lyngba ka State Rural Employment Society (SRES) kaba dei ka nodal Implementing Agency hapoh ka tnad C&RD Department kala dep shim jingkhein haduh 6426 tylli ki shnong bad la thung ruh 6,354 Surveyors ban pyntyllun iaka iaka jingtreikam ka Awaas+ database da kaba pyndinkam iaka eKYC face based authentication.

Ka long kaba kongsan ia baroh kito kiba lah ban ioh jingmyntoi ba kin ai ia ki kot ki sla kiba donkam kata ia ka Aadhaar card, MGNREGA Job Card, Bank Account, Swachh Bharat Mission (SBM) Number, Voter ID bad Caste Certificate lem bad ka Affidavit ba pynbna ba kim don la ki jong ki iing ki sem.

Ka Housing Mission ka dei kawei na ki santylli ki thong jong ka roi ka par jong ka sorkar Meghalaya.Lyngba kane ka Mission, ka jylla ka thmu ban iakhun pyrshah ia ka jingduh bad ban buh ia ka thong ka jingkiew shaphrang ha ka jingpynioh iing baduk bad kiwei pat ki jingshakri kum ha ka liang ka pule puthi, ka koit ka khiah, ka umbam umdih kaba khuid bad kiwei kiwei.

U Myntri Rangbah ka Jylla u Conrad K Sangma u la ong, “Ka Sorkar Jylla ka pynthikna halor ka jingkut jingmut na ka bynta ban pynioh iing sha baroh, kata ha ka jingiakhun ia ka jingduk jingkyrduh.Dei ban shim ia baroh ki sienjam da baroh ki kynhun kiba don bynta ban pynthikna ba kin ym don satia kiba shah iehnoh ha kane ka jingleh ia ka sorbe.”

Nalor kata u kyntu ruh ia baroh kito ki longiing kiba dei hok ban ioh iing baduk bad ki nongioh bynta ia ka PMAY-G ba kin pynkhreh ia baroh ki kot ki sla ba donkam bad ban iashim bynta ha ka jingpynlong ia kane ka jingleh ia ka sorbe. U la kyntu ruh ia ki kynhun seng kiba don ha ki shnong ki thaw kaba kynthup ia ki VEC, VDC, VO, SHG ba kin iashim bynta shitrhem ha ka jingpyntreikam ia kane ka sienjam khlem da iehnoh shadien iano iano ruh.