Pyntip u CM ba ka Sorkar ka buh hakhmat ban kyntiew ia ki samla ha ka jingthaw ia ki polisi

Syllad | The Rising MeghalayaJanuary 21, 2025

U Myntri Rangbah ka jylla u Conrad K Sangma ha ka 20 tarik Kyllalyngkot u la ban jur ia ka jingkut jingmut jong ka sorkar jylla ban phaikhmat kyrpang bad ban buh hakhmat ia ki jingdonkam jong ki samla ka jylla ha ka jingshim ia kino kino ki rai.

Haba kren ha ka jingialang sam khusnam Meghalaya IT Awards sha ki samla kiba wan shakhmat ha ka klas X bad XII da ki laptop, u Myntri Rangbah u la pynpaw ia ka jingkongsan ban pynkupbor ia ki samla ban ialam ia ka jylla ba kan kiew irat bad ban kyntiew ia ka roi ka par.

“Ka sorkar ka la pynleit jingmut bha ha kaba iadei bad ki samla ka jylla,” u la ong. “Ki samla ki dei kiba don hapdeng eh ha ki jingshim rai ki jong ngi, bad kaei kaei baroh kaba ngi leh ka dei kaba thmu na ka bynta ka bha ka miat jong ki samla. U la ban jur ruh ba ki prokram bad ki polisi treikam ki dei kiba la pynwandur ban ai ka jingshakri bad pynbit pynbiang ia ki jingangnud jong ki samla,” u la bynrap.

Haba kren halor ki jingpyrshang jong ka sorkar ban kyntiew ia ki jaka ialehkai sports, u Conrad u la ong, “Ngi kwah ban saindur ia ki sap ki phong jong ki samla khnang ba ngin lah ban pynkhreh ia ki ba kin ia aireng ha ki ryngsan iakop hapoh ka ri bad ki ri ka pyrthei, kynthup sha ka lympung Olympic.”

“Kane ka sienjam ka long shibynta jong ki buit treikam ka sorkar ban kyntiew ia ka roi ka par bad ban pynkupbor ia ki samla ba kin lah ban pyndonkam pura ia ki sap ki phong ki jong ki,” u la ong.

Haba ai khublei sha ki palat 300 ngut ki samla pule kiba wan shakhmat ha ki jingpule jong u snem 2023-24 kiba la ioh pdiang khusnam ha ka jingialang kaba la long hapoh Soso Tham Auditorium Shillong, u Conrad u la kyntu ia ki samla pule ba ki dei ban long kiba bat ia ka por bad kiba don ia ka discipline ha ka jingim jong ki.

“Kane ka khusnam ka dei ka jingithuh jong ka sorkar ia ka jingjop ka jong phi bad kane ka dei tang ka jingsdang jong ka jingiaid lynti ha ka jingim ka jong phi. Ngi ngeit skhem ba phin bteng ban trei shitom bad ban mynsiem ia kiwei kumjuh” ula ong.

“Da kaba pynpaw ba ki rukom treikam kiba pynshong nongrim ha ki skhim bunsien ki iehnoh ia ka thong ba kongsan ka ban ktah  ia ka jingim jong ki briew, u Myntri Rangbah u la ong, “Ki sorkar bunsien ki treikam ha ka rukom treikam kaba pynshong nongrim ha ki skhim, ha kaba ngi pynleit jingmut ha kaba pyntreikam ia ki prokram kum ka PMGSY, JJM, bad ki skhim sha ki nongrep, hynrei ha ka jingiaid lynti ngi klet ba ka jingthmu jong kine ki skhim ka long ban pynkylla ia ka jingim jong ki briew.”

Shuh shuh u la ong ba mynta ka sorkar ka la sdang phaikhmat noh ha ka rukom pynleit jingmut jong ka na ka jingpyntreikam sha ka jingpynmih, da kaba buh hakhmat ia ka jingioh nong bad ki jingkylla lyngba ki prokram kaba ki lah ban ai sha ki paidbah.