Pyntip u CM ba kam mih ka jingkylli ban pynkylla ia ka LTA bad iaid lait ia ki ADC ha ka kam thied jaka hapoh ka IMA

Syllad | The Rising MeghalayaJanuary 11, 2025

U Myntri Rangbah ka Jylla u Conrad K Sangma ha ka 10 tarik Kyllalyngkot u la ong ba kam mih satia kano kano ka jingkylli ba ka sorkar ka pyrshang ban pynkylla ia ka Land Transfer Act (LTA) bad ban iaid lait ia ki Autonomous District Council (ADC) ha kaba iadei bad ka jingthmu thied jaka (land bank) ban pynshlur bad kyntiew ia ka jingwan seng ia ki kam ba kongsan ha ka Jylla.

Haba kdew halor ki jingkynnoh bad pyrshah ia ka Investment Meghalaya Agency (IMA) kum ka jingtip kaba sngewthuh bakla, u CM u la ong ba kalong kaba bakla jur ban ong ba ka sorkar kan sa pynkylla ia ka Land Transfer Act.

“Shah ba ngan pynshai sha baroh ba kam long kaba dei naba kam don satia ka jingpynkylla ia ka LTA. Kam don ka jingkylli ban iaid lait ia ki District Council lane ia ki Khlieh Nongsynshar shnong ne ki Rangbah Shnong. Kam don ka jingkylli ba ki kompeni shimet kin wan ban thied jaka da lade hi. Kam don kano kano ka jingpynkylla ia kine, ym shym la leh ei ei bad ngin ym leh ei ei hi ruh ia kane ka bynta,” kular u CM.

Haba pynpaw halor ka rai jong ka Kynhun Myntri halor kane ka phasng, u CM u la ong, “Naduh ka sngi kaba nyngkong, ka jingkylla kaba ngi la wanrah ka long ba ngin ailad ia ka IMA ba kan thied jaka bad ban buh ia ki jaka kumba leh ka MIDC bad MTDC. Kane ka dei ka agency ka ban kyntiew ia ki kam sengkam sengjam ha ka jylla.”

“Halor ki katto katne ki jingmih khubor kiba ong ba ngi la kynran dien, hynrei ngi khlem kynran dien satia.Ka jingshisha hi ka long ba phi la ai ia ka khubor kaba bakla naduh kaba sdang. Ngi shu pynshai ba ki jingpynpaw jong phi ki long kiba bakla bad naduh ka sngi kaba nyngkong ngi la ong ba ka jingkylli kam mih satia halor kine ki laitylli ki mat,” u la ong da kaba bynra ruh, “Lada don kiba sngewkhia da kino kino ki kynhun lane da kino kino ki agency ne District Council ngin jin da la kmen ban iakren, ngi long kiba kmen ban pynshai ia kane ka kam.”

Nalor kata haba batai ia ka bynta jong ka IMA, u Conrad u la ong, “Ka IMA ka long kum kawei pat ka bor treikam jong ka sorkar Meghalaya. Ka dei ka shnat ha kaba ki briew kin aplai ban ioh jingbit na ka bynta ba kin sdang ia la ki jong ki kompeni bad ruh ban ioh ia ki subsidy kiba ka jylla bad ka sorkar pdeng ki tyrwa.”

“Kham hashwa ka ju don ka Single Windon Agency (SWA), hynrei kane ka kam pynleit jingmut ha ki kam karkhana. Mynta ngi don ia ka jingseng kam ha ka liang ka koit ka khiah, ka kam pynmih bording, ka kam jngohkai bad ka pule puthi.Kumta ha ka kam pule puthi ki dei ban leit sha ka tnad Education ban ioh jingbit ne sha ka tnad industry, lane lada kwah sdang ia ka hospital un leit sha ka tnad ka koit ka khiah ne sha ka Single Window Agency ban ioh jingbit. Kumta ruh halor kine ki jyrwit jyrwat ngi la rai ban wanrah noh da ka IMA ha kaba baroh ki tnad kin ia don lang,” ong u CM.