Pyntip u CM ba la ioh jingbit ka Meghalaya ban sdang ia ka jingtih dewiong da ka juk stad saian

Syllad | The Rising MeghalayaJanuary 31, 2025

U Myntri Rangbah ka Jylla, u Conrad K Sangma ha ka 30 tarik Kyllalyngkot u la pyntip ba ka Sorkar Pdeng ka la aijingbit na bynta ban sdang noh ia ka kam tih dewiong da ka juk jingstad saian ha ka jylla Meghalaya.  

Shibynta jong kane ka rai ka la don ka jingiasoi hapdeng hapdeng ka Controller of Coal, ka Sorkar India bad ki trai ki ban pyntreikam ia ka jingtih par ha ki laitylli ki jaka ha ka Jylla, kata ha Pyndengshalang, West Khasi Hills, Saryngkham, East Jaintia Hills, bad Lumiakhi Wahsarang, East Jaintia Hills.  

Haba pynpaw lyngba ka rynsan social media X, u CM u la ong, “Kumba la kular ka sorkar jong ngi ka la pynurlong ia ka jingkular na ka bynta ban plie noh ia ka kam tih dewiong lyngba ka juk stad saian ha ka Jylla da kaba iatreilang ryngkat bad ka Ministry of Coal.”  

“Nalor kine ki laitylli, sa 12 tylli ki aplikeshon ki la don ha ka jingbishar ban ioh ia ka jingmynjur, bad ngi la bteng ban buddien ia ki da ka jingkyrshan ki kynhun kiba kyrshan ia ka project bad ka jingshimkhia jong ka Tnad Mining and Geology,” u la ong da kaba bynrap ruh ba kane ka jingshim rai ka dei ka jingjop kaba khraw na ka bynta ka jingkiew shaphrang jong ka jylla Meghalaya. 

Haba kren sha ki lad pathai khubor, u Conrad u la ong, “Nga sngewkmen ban pyntip sha baroh ba mynta ngi la ioh ia ka jingmynjur kaba khatduh ban plie ia ki par dewiong. Kumta ruh mynta ki laingut ki nongpyntrei par ki lah ban plie noh ia ki par dewiong jong ki katba ki mon, ki lah ban sdang noh mynta ka miet lane lashai katba ki mon.”  

Na ka liang u CM u la ong ruh ba kane ka dei ka sngi sahkynmaw ha ka histori na ka bynta ka jylla Meghalaya, bad u pynpaw ruh  ka jingkyrmen skhem ba ka jingsdang ia ka jingtih dewiong lyngba ka juk jingstad saian kan pynkut noh ia ki kam tih bad khaii dewiong beain ha ka jylla.  

Ha kajuh ka por u la ong ba ka sorkar ka khmih lynti ba ka jingioh lum khajna na u dewiong kan long hapdeng 500 haduh 900 klur tyngka shisnem.