Pyntip u CM ban pyndep lut ia ki project ba kongsan ha New Shillong Township ha kaba kut u 2026

Syllad | The Rising MeghalayaNovember 21, 2024

U Myntri Rangbah ka Jylla u Conrad K Sangma ha ka 20 tarik u Naiwieng u la pyntip ba ia kiba bun ki project kiba kongsan ba la pyntrei hapoh New Shillong Township yn sa pyndep ha kaba kut jong u snem 2026.

U CM ha ryngkat ka jingsynran lang da u Symbud Myntri Rangbah uba khmih ia ka Tnad Urban Affairs u Bah Sniawbhalang Dhar ki la pynlong ka jingleit jurip ia ka jaka kaba 232 akar ba la aiti na ka bynta ban tei ia ka New Shillong Administrative City, ka ban don ia ka Administrative Complex kaba heh bad ka ban kynthup ia ka Secretariat Building bad baroh ki Directorate.

“Ngi la don ha kane ka jaka ha kaba yn tei ia ka Secretariat kaba thymmai bad ki Directorate bathymmai jong ka sorkar Meghalaya, hynrei kan ym long tang ka Secretariat bad Directorate kumba phi iohi sha lyndet jong nga, ki la don shibun ki project kiba dang pyntrei ha kane ka jaka, kata la ka long ka IT Park phase 1-2, Utility Mall, Integrated Command & Control Centre (ICCC), Skill Park ba thymmai, Prime Hub, ia ka Heliport ka Shillong ruh yn tei ha kane ka jaka bad ka Urban Building kaba heh kan sa wan hangne” ong u Conrad haba iakren bad ki nongthoh khubor.

“Ki la don shibun ki kam kiba dang iaid bad ngi kwah shisha ba kane ka zone baroh kawei kan long ka jaka kaba la pynkhreh bha khnang ba kan long kaba kyrpang bha bad ka ban long ka nongbah kaba thmu na ka bynta ka lawei bad ngi kyrmen bad ngi thmu ban khmih lypa sha ki 50-100 snem ki ban wan ba kin long kiba biang nadong shadong. Na kata ka daw phi iohi ba ki surok kiba ngi thmu ban shna ha kane ka jaka kin dei kiba heh bad kylluid..Kata kadei ka jingiohi kaba ngi la iaid shakhmat,” u la bynrap.

Ha kajuh ka por u Conrad u la pynpaw ruh ia ka jingkmen ban iohi ha kaba iadei bad ka jingiaid shakhmat ha ka jingpyntrei ia ki project ha kane ka jaka.

“Nga la wan mynta ha ryngkat u Symbud Myntri Rangbah nalor ki Ophisar ban peit ia ki project bapher bapher kiba la pyntrei bad ngi sngewkmen ban iohi ba bun na kine ki project ki la dep bad bun ruh kiba dang iaid shakhmat bad ha kaba kut jong u 2025, ngin iohi ia ka jingpyndep ia kiba bun ki project bad ha kaba kut jong u 2026 ngin sa iohi ba bun na ki project kiba heh kin dei kiba la pyndep lut,” ong u Conrad.

Shuh shuh haba pynpaw ba ka jaka ka long kaba kongsan na ka bynta ka roi ka par jong ka jylla, u CM u la ong, “Ngi sngewkmen shibun ban iohi ba ki kam kila iaid kumba la thmu bad nga kwah ban ai khublei ia u Symbud Myntri Rangbah ba khmih ia ka Tnad Urban Affairs lem bad ka kynhun jong ka Tnad kiba la pynleit jingmut bha bad pynurlong ia kine baroh.”