Pyntip u Mondal ba kyrshan pura u CM ban pynjanai ia ka jingtreikam ka MeECL bad pynmih bording

Syllad | The Rising MeghalayaMarch 28, 2025

U Myntri ka Tnad bording u AT Mondal ha ka 27 tarik Lber u la ong ba u la ioh ia ka jingkyrshan kaba pura na u Myntri Rangbah ka Jylla u Conrad K Sangma ban pynjanai ki rukom treikam jong ka Meghalaya Energy Corporation Limited (MeECL) bad kumjuh ha kaba iadei bad ka jingpynmih bording ha ka jylla.

“Nga la ioh ia ka jingkyrshan kaba pura na u Myntri Rangbah. Ngam ju poi pyrkhat ba un ai kat kane ka jingkyrshan na ka bynta jong ngi bad dei na kata ka daw ngi la iatreilang ryngkat ryngkat ban iohi ba ka jingtreikam ba janai jong ka MeECL kumjuh ban pynjanai ha kaba iadei bad ka kam sam bording, kumjuh haba don kino kino ki jingduna ngi la pynbeit ia ki,” ong u Mondal haba kren sha ki lad pathai khubor.

Da kaba pynpaw ba mynta ki la don shibun ki jingiapher, u Mondal u la ong ba ki paidbah ka jylla ki ju mad ia ka jingpynlip bording kaba 7-9 kynta shi sngi ha u snem 2023. Hynrei mynta nga ong ba ngi dang lait na ka jingpynlip bording,” u la pynbna.

Une u Myntri watla katta u la ong ba kan sa don ka por ha kaba ki paidbah kin hap mad ia ka jingpynlip bording da ka MePDCL namar ki kam maramot bad jingpyntrei ia ka Revamped Distribution Sector Scheme (RDSS) ba dang iaid shakhmat mynta.