Pyntip u Myntri ba kynjoh haduh 78.5% ka jingshna ia ki painkhana ha kylleng ka Jylla 

Syllad | The Rising MeghalayaDecember 11, 2024

“Haduh mynta ka Jylla ka la lah ban shna haduh 53627 tylli ki painkhana ha ki longiing bad 1108 tylli ki paiinkhana shnong, kata kaba la kynjoh haduh 78.5% baroh,” ong u Myntri ka Tnad PHE u Marcuise N Marak haba kren sha ki lad pathai khubor ha ka 10 tarik Nohprah kaba dei ruh ka sngi pynkut ia ka sienjam ba la tip kum ka “Hamara Shauchalay: Hamara Samman”.

U la ong ba ia kane ka sienjam ‘Hamara Shauchalay: Hamara Samman’ la sdang pyntreikam ha ka 19 tarik u Naiwieng 2024 ha ryngkat ka thong ban ialap halor ka jingdonkam ia ki painkhana ha baroh ki iingbriew bad ki shnong ki thaw.

“Kane ka jingpynsngewthuh paidbah ka la kut noh ha ka 10 tarik Nohprah 2024, kata ka sngi ba la rakhe ha kylleng ka pyrthei kum ka Human Rights Day namar baroh ki briew kidei kiba la kha laitluid bad mar kumjuh ha ka longrngieng bad ki hok kaba dei ruh ka mat kaba hakhmat eh.

U Myntri u pyntip ruh ba ka Tnad ka la ioh pdiang haduh palat 14.80 lak tylli ki aplikeshon ban shna ia ki painkhana ha ki longiing  jong ki riew shimet.

“Na kane, ngi la pyllait ia ka song pisa na ka bynta ka jingshna ia haduh 87,184 tylli ki painkhana na ka bynta ki longiing shimet ba ki shnong bapher bapher ha ka jinglut kaba kot T.12,000 kawei kawei,” u la ong.

Nalor kata u Myntri u la shong bishar kam ruh halor ka jingpyntreikam ia ka mission hapoh ka jylla bad ong, “Nga la pynpaw shai ba ka tnad ka dei ban pynthikna ba baroh ki painkhana shimet bad ha ki shnong ki thaw ki dei ban long ban long kiba treikam.”

U la pynpaw ruh ba ka Jylla ka la kynjoh sha ka 83.81% ha kaba iadei abd ka Open Defecation Free (ODF) plus status.

Haba kylli, u Marak u la ong ba ka mat kaba iadei bad ka jingioh jaka ka dei kawei na ki jingeh haba pyntreikam ia kane ka mission.

“Kumta nga kyrpad ia ki Rangbah Shnong, Nokma bad ki Daloi jong ngi ba kin iatreilang bad ka sorkar ha kaba iadei bad ka jingshna ia kine ki jingtei khnang ban lah ban kynjoh sha ka thong kaba 100 percent ka jingshna ia ki painkhana hapoh ka Jylla,” u la bynrap.