Pyntreikam iaka ‘Equal Pay for Equal Work’ ong ka synjuk ki nongtrei Muster Roll ha Rilum Jaintia iaka sorkar

Syllad | The Rising MeghalayaDecember 13, 2021

Ka All Jaiñtia Muster Roll Workers & Labour Union (AJMRWLU) da kawei ka sur kala rai ban buddien iaka hok ba ki muster roll, ki nongbylla sngi ki dei ban ioh bad dawa ruh ban pyntreikam iaka ‘Equal Pay for Equal Work’ naka sorkar jylla haka Annual General Meeting kaba long haka 10 tarik une u bnai ha Jrisalein, Chutwakhu, Jowai.

Ha kane ka jingialang paidbah ka AJMRWLU kala jied pynthymmai ruh iaki nongkitkam naka bynta ka samoi treikam jong u snem 2021-23.

KI nongkitkam ki kynthup iaka kong Dayoowanphi Iakai – President, Kitboklang Shadap -Vice President, Army Mulad – Vice President, Dapherborn N Suchiang – General Secretary, Hunbeitki Dkhar – Assistant General Secretary, Sina Sumer – Assistant General Secretary, Manda Bareh – Finance Secretary, Banaras Dhar – Assistant Finance Secretary, Khroo Lamsalanki Pariat -Adviser bad ki nongkitkam ha ki Unit kin long ki dkhot Executive Members ka CEC.

Shuh shuh ka synjuk ki nongtrei muster roll kala rai ban buddien ban dawa pyntreikam iaka scheme (RCW) Regular Casual Workers 1996 ban pynskhem iaki muster roll kiba la trei palat shiphew snem shaneng ban pynhap hapoh ka RCW ne ki highly skilled.

Kiwei pat ki rai kalong ban dawa naka sorkar ban pyllait iaka hok jong ki nongtrei bylla lyngba ka Meghalaya Building and Other Construction Welfare Board, kam ki Scheme Education Scholarship, Death Benefits, Pension bad kiwei kiwei.

Ban kyrpad n aka sorkar ban pyllait iaka bai bylla hapoh 10 tarik manla ka bnai kumjuh ban pynjlan iaka por shongthait ki nongtrei muster roll.

Ha kaba iadei bad ki nongshet ja sngi Mid Day Meal ki khynnah skul la dawa ban kyntiew iaka Honorarium Rs. 1000 shi bnai ban siew baroh shisnem (12 bnai) haka jaka 10 bnai haka shisnem.

Kane ka synjuk kala dawa da ka ‘Equal Pay for Equal Work’, naduh ka kam Chowkidar, Cleaner, Peon, Accountant namar ba kine ki kam la trei ruh da ki Muster Roll bad ka jingtrei kalong kat juh ka jingkhia, ka jingsiew pat ka bym iaryngkat bad ka kam.