Pyrkhing ka Mookyrdup ia ka rung ka mih ki briew ba nabar shnong

Syllad | The Rising MeghalayaApril 4, 2020

Ka Dorbar Shnong Mookyrdup kawei na ki shnong ha ka nongbah Jowai kum shi bynta ban pyntreikam ia ka jingkhang shnong bala khot da ka sorkar ia kaba la tip kum ka Lockdown na ka bynta ban ialeh pyrshah ia ka jingpur jong u khniang Coronavirus kala pyrkhing bha mynta ia ka rung ka mih jong ki briew, khamtam ia kito kiba wan nabar jong ka shnong.

Na ka liang ka Dorbar Shnong ryngkat ka jingiatreilang bad ka VDP kila pynlong da ka jingap shnong ban teh lakam ia ka jingrung ki briew ba nabar shapoh u pud u sam jong ka shnong Mookyrdup.

Na ka liang jong u Waheh Shnong ma Pyrkhat Shylla ula iathuh ba ka shnong kam banse ban pyrkhing ia ka rung ka mih jong ki briew, khnang ban iada na kane ka jingpang kaba shyrkhei. Ula ong pat ba ka shnong kan ym khang ia kito ki briew kiba wan donkam shisha kum ka jingshim dawai ne kiwei pat ki kam kiba kongsan. La kyntu ruh ia ki nongshong shnong ka Mookyrdup ba lada dang don kiba wan na bar jylla kin ai jingtip sha ki nongpyniaid shnong bad kumjuh ruh sha ki bor jong ka koit ka khiah. Ula kyntu ruh ia ki nongshong shnong ban kohnguh bad burom ia ki hukum jong ka sorkar.

Na ka liang ka VDP lyngba u President ma Dephai Bareh ula kyntu ia ki para VDP ban shim khia ia ka kam bad ruh ba kin ieng ia jngai iwei na iwei (Social Distances) ha ka por ba ki don duty. U la kyntu ruh ia ki baroh ki nongleit nongwan ban burom bad kohnguh ia ki hukum jong ka shnong.