Pyrshah bret ñiut ki paidbah ha Constituency u Myntri Pynroi Sor

Syllad | The Rising MeghalayaDecember 20, 2021

Sa shisien ka Jowai Municipal Board (JMB) kala ïakynduh mawsiang hadien ba ki nongshong shnong jong ka Elaka Nartiang ki la beh krad ïa san tylli ki trok jong ka Jowai Municipal Board (JMB) kiba la thmu ban leit bret ñiut ha Thadmusem haka sngi Nyngkong.

Kane ka shnong ka hap haka constituency jong u Myntri Pynroi Sor ma Sniawbhalang Dhar.

Kitei nongshong shnong kiba don kumba 200 ngut eiei hapoh ka lama jong ka Elaka Nartiang Coordinate Committee ha ka jingïalam u Acting Dolloi u Ma Kloi Pale, u Secretary Elaka Nartiang Coordinate Committee u Ma Deimonmi Dkhar, ki kynhun sengbhalang ba kynthup iaka KSU, FKJGP, HNYF, MPUF, JSM bad ki nongshong shnong.

Katei ka Committee ka pyrshah bad beh krad ïaki 5 tylli ki trok kit ñiut jong ka JMB namar ba ki bor pynïaid jong ka JMB kim la kynjoh ktien tang shi kyntien ruh ban leit bret ñiut sha Thadmusem kaba dang hap hapoh u pud u sam jong ka Elaka Natiang.

Ki paidbah ki la ap hi triang naduh ka por 12 baje mynta ka sngi ban khanglad ïaki trok kit ñiut sha katei ka jaka bad haka por janmiet kumba 4.00 baje eiei ka jingap khmih lynti ka la long kaba seisoh hadien ba 5 tylli ki trok bad ki ñiut kiba la wan kit na nongbah Jowai ki la wan poi ha katei ka jaka.

Hadien katto katne por ki pulit ki la wan poi ha katei ka jaka ban pyrshang ban ïakren bad ban ailad ban leit bret ïa utei u ñiut hynrei ki paidbah ki la ïeng skhem hi triang ban pyrshah bad beh ïa kitei ki trok namar ba ki sheptieng ïoh ka wanrah ka jingpang jingshitom ïaki na kitei ki ñiut kiba la wan bret kino kino ki lad jingïada.

Khatduh khatwai kitei ki 5 tylli ki trok ki hap ban phet ïam rem ryngkat u ñiut na katei ka jaka.

Kumban shu pynkynmaw ka JMB ka hap ban pynduh pyndam noh ïaka jaka bret ñiut kaba don ha Mynkjai kaba hap hapoh ka Amlarem Sub-Division na kadaw ka jingpyrshah jong ki nongshong shnong jong katei ka thaiñ.

Kadaw ka jingpyrshah jong ki nongshong shnong ka long namar ba ka JMB ka la shu wan bret pathar ïa u ñiut u ñier na nongbah Jowai khlem da shim kino kino ki lad jingïada ne katkum ka jingstad saïan kaba mynta.