Pyrshah jur ka DS Moolamylliang ia ka public hearing ai NOC da u Dolloi ka Sutnga

Syllad | The Rising MeghalayaNovember 6, 2023

Ka Dorbar Shnong Moolamylliang ka pyrshah jur ia ka jingkhot pynlong ia ka jingpynsngew paidbah ne public hearing ka ban long lashai ka 7 tarik sngi ba Ar ha Iew Umpleng, Moolamylliang ha kaba iadei bad ka jingai NOC da u Dolloi jong ka Elaka Sutnga sha ka Kong My Please Siangshai bad u Bah Ajay Shylla na ka bynta ka jingplie ia ka dukan die kyiad ne wine store.

Lah ban kdew hangne ba katkum ki kyndon jong ka section 31(11) jong ka Jaintia Hills Autonomous District (Establishment of Elaka and village and Election Power, function and jurisdiction, of Dolloi Sordar and Waheh shnong Act 2015) ka la kdew shai ba ia kaba kum kane ka jingai NOC dei ban ai da ki Rangbah Shnong jong jong kito ki shnong bad ki Dolloi kim don bor satia ban ai ia kaba kum kane ka NOC.

Ka dorbar shnong Moolamylliang kala ong ba kane ka jingleh jong u Dolloi ka long pyrshah ia ki kyndon ain bad ia ka Act jong ka Council, bad na ka liang ka Dorbar Shnong ka la phah ka jingkyrpad sha u Deputy Commissioner ka East Jaintia Hills ha kaba iadei bad kane ka phang.

Na ka liang ka Dorbar Shnong ka maham ruh ba lada kane ka jingthmu ban pynlong ia ka public hearing kan iaid shakhmat ha kaba iadei bad katei ka mat, na ka liang ka Dorbar kan ujor sha ka iingbishar.