Pyrshah jur ka DS Umdeinlin ba shah pynhap jubor sha ka Mowkaiaw Constituency

Syllad | The Rising MeghalayaAugust 9, 2024

Ka Dorbar Shnong Umdeinlin, West Jaintia Hills ka la phah da ka jingthoh sha u Chief Executive Member (CEM) ka JHADC, Jowai ban pynpaw ka jingpyrshah kaba jur halor ka rukom phiah constituency ha kaba la phiah bad pynhap jubor ia kane ka shnong naka 13 Saphai Constituency sha ka Mowkaiaw Constituency, kata da kaba kynthup tang ia kane ka shnong.

U Bah Nangaibormi Sutnga Waheh Shnong ula ong hadien ba la iohi lyngba ki lad pathai khubor ia kane ka jingphiah ia ka shnong ka jong ki, ki la khot pynlong mardor ia ka jingialang ha ka 8 tarik Nailar na ka bynta ban pynsngew sha ki paidbah nongshong shnong halor kane ka jingthmu jong ka JHADC ban phiah ia kane ka shnong ka jong ki.

Ha kane ka Dorbar da kawei ka jingmut la rai ban ieng pyrshah jur ia kane ka jingthmu ban phiah ia ka shnong ka jong ki halor ka nongrim ba kane ka shnong Umdeinlin kaba don kumba 710 vote ka dei ka shnong kaba don sha jngai na kiwei ki shnong kiba hap hapoh Mowkaiaw Constituency.

La ong ruh ba ka shnong Umdeinlin kadei ka shnong  kaba dang hap hapoh ka Iooksi Pyllun kaba kynthup ia ki 5 tylli ki shnong kata ka Iooksi Iapkhla, Iooksi Priang, Iooksi Kyanmynsar, Iooksi Umdeinlin bad Iooksi Tongkiad. Hynrei ka jingphiah ba tang marwei iaka shnong ka dei ka buit (Preplan) ban phiah arliang iaka shnong Iooksi Pyllun

Ka shnong Umdeinlin kam dei kaba hap markhap bad ki khappud (Border) jong ka Mowkaiaw Constituency, kumta lada dei ban dro Map, ka shnong jong ngi kam hap shuh hapoh u pud u Sam (Geographically Condition) ka Mowkaiaw Constituency.

Nalor kata ka shnong Umdeinlin ka dei ka shnong kaba don marjan bad ka Shnong Saphai, Iawthymmei, Iooksi Iapkhla, Iooksi Priang, Iooksi Kyanmynsar, Iooksi Tongkiad, Umsalait bad Sahsniang, kumta ka jingpynhap jubor iaka shnong sha ka Mowkaiaw Constituency ka dei ka jingiuhroit iaka shnong ka thaw bad ka pynjngai iaka jingiadei kam iadei jam.

Shuh shuh la ong ba katkum ka Notification ba la pynmih ha ka 4 tarik Naitung 2024 na ka bynta ka Public Hearing ia ka ban phiah ia ki Constituency ka JHADC, Jowai , na ka bynta ka 13 Mowtyrshiah – Saphai kaba kynthup ia ka shnong Mukhap, Dong Wahshnong Mukhap, Mowtyrshiah A, Mowtyrshiah B, Khonshnong, Nongryngkoh, Madanrwai, Chutwakhu- Sarhen, Lakadong , Madan Pohkseh, Iooksi Tongkiad, Iooksi Kyanmynsar Thlongmoo, Umdeinlin, Priang, Rud Kupli Iawthymmei, Saphai Pohrtiang.

Halor kane ka Synjuk Waheh Shnong Iooksi Saphai Circle kaba kynthup iaka shnong Saphai, Iawthymmei, Priang, Umdeinlin, Iooksi Iapkhla, Iooksi Kyanmynsar Thlongmoo, Iooksi Tongkiad, Lakadong, Madan Pohkseh, Khonshnong, Nongryngkoh, Madanrwai, Chutwakhu- Sarhen da kajuh ka sur ki la pdiang hun ia katei ka Notification ha ka Public Hearing kaba dang shu dep pynlong, hynrei phewse hadien ka Public Hearing pat la pynkylla markhongpong ia ki shnong kiba dep mih ha ka Notification. Kumta kane ka pyni ba kam don jingmut ka jingpyllong ia ka Public Hearing bad kadei pynban tang ka jingleh pyndep rukom.

Kumta halor kane ka bynta, na ka liang Ka Dorbar Shnong ka la kyntu ia ki bor ba dei peit  ban pyrkhat thymmai noh da kumwei da kaba pynneh ia ka shnong ka jong ki hapoh ka Sahsniang – Saphai Constituency.