Pyrshah jur ka Elaka Darrang ia ka Umngot Hydroeletric Project

Syllad | The Rising MeghalayaMarch 31, 2021

Ka elaka Darrang kaba kynthup iaki hynriew tylli ki shnong ka pyrshah jur iaka public hearing kaban long haka 9 tarik u Iaiong ha Moosakhia na ka bynta ban shna Umngot Hydroeletrical Project.

Ka elaka Dathrang kadei ka shnong kaba kynthup iaka Darrang, Dawki, Shnongpdeng, Lymba, Kongwang bad Ri Kynjai kiba hap sha ki bynta ba sharum ka wah Umngot.

Ka elaka ka lah dep lum jingialang bad baroh ki Rangbah Shnong kiba don hapoh ka elaka bad ryngkat ki seng bhalang kiba kynthup iaka ka KSU, JSU, HNYF bad FKJGP bad ka rai kaba mih na kane ka jingialang ka long ban ieng pyrshah ia ka jingkhang dam ia ka wah Umngot haka jaka Moosakhia ha West Jaintia Hills bad Siangkhnai ha East Khasi Hills.

Na ka liang u Dalloi ka elaka Darrang u la pynpaw ba lada jia yn khang dam ia ka Umngot ha kitei ki shnong ba sha neng kan buh jingeh ia ki paid ki raiot ka elaka Darrang bad kiwei de shnong kiba don sharum ka wah namar kan wanrah ia jingtyrkhong um bad kan sa pynkylla iaka rukom im rukom trei ki nongshong shnong hakine ki thaiñ bad shibun ka jingduh nong kaba khraw naduh ka um bam um dih. Ka um sha ki jaka rep bad sha ki bri tympew bad kiwei ki jingthung kin tyrkhong. Ka wah umngot kan ktah iaki jingdon ki maw wah bad u shyiap uba ki briew ka thaiñ ki ju pyndonkam ha kaban shna ing bad bun naki nongshong shnong kiba im nong na une u shyiap um.

Ka jingtyrkhong um kan ktah ruh iaki jingdon ki doh um namar ka wah Umngot kadei ka paw bha ka jingdon bas jingbun ki dohkha, naka liang u Dalloi u lah pynpaw ruh ka jingtyrkhong um lada jia ba dam iakane ka wah kan ktah iaka jingkhuid jong kane ka wah namar kadei wah kaba paw nam tam ha kylleng satlad ka pyryhei bad ka lah ioh nam kum kawei naki wah kaba khuid jnger tam ha pyrthei bad lada ka duh noh iakane ka nam ki nongshang suwari ruh kin sangeh ban wan poi sha kane ka thaiñ bad bun naki khynnah samla ka thaiñ kin sa duh noh iaka lad kamai lada jah noh ka kam Tourism.

Na ka liang ka elaka ki lah dep ban phah shithi sha ka bor distrik u DC ka West Jaintia Hills,JHADC,sha ka Meghalaya State Pollution and Control Board bad sha ka Minstry of Forest and Environment, Govt of India ban pyrshah ban khang dam iaka wah Umngot nabynta ban ring bor ding hapoh ka jylla.

Na ka liang u Dalloi ka elaka Darrang u la ong ba ka elaka kan ieng skhem ha ka nongrim ban pyrshah ha ka sngi 9 tarik u bnai April ha ka public hearing ban long ha Mossakhia.

Na ka liang ka elaka ka kren shai ba kim pyrshah satia ia ka jingring bording hynrei tang ia ka jaka ban dam kam long kaba biang namar lada dam ia ka Umngot kiba sah sharum ka wah kan sawanrah ia ka jingeh kaba khraw ia u paidbah bad iaki jingthung tep baroh kiba don hapoh ka jaka.