Pyrshah jur ka HITO ia ka jingthmu pynlong public hearing ka Meghatop Cement Pvt Limited

Syllad | The Rising MeghalayaOctober 12, 2024

Ka Seng Hynniewtrep Integrated Territorial Organization(HITO) Narpuh Circle, ha ka tarik 09 Risaw ka la phah da ka jingthoh sha ka Meghalaya State Pollution Control Board(MSPCB) lyngba u Deputy Commissioner ka East Jaintia Hills District u Shivansh Awasthi, IAS, ban pynpaw ka jingpyrshah kaba jur halor ka jingthmu jong ka Meghatop Cement Pvt Limited ban pynlong ia ka Public Hearing ha ka tarik 18 Risaw 2024 na ka bynta ban tei ia ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16MW Waste Heat Recovery System) ha shnong Wahiajer Narpuh, EJHD.

Ka Seng HITO lyngba u kyrwoh ba la soi da U President bad General Secretary ki la pynpaw ba ka nongrim kaba ka Seng ka ieng pyrshah ia kane ka jingthmu ka dei namar ba ka jingwan tuid ki bar jylla ha East Jaintia Hills ka long kaba la i shyrkhei bad kaba buh ha ka jingma kaba khraw hadien habud bad ka ban sa ktah ia ka kamai kajih jong ki pateng ki ban sa wan lada u mynder u ioh kurup lut ia ka khaii ka pateng jong kiba mynta, bad ym slem shuh ruh ba ka synshar khadar shnong kan jot kan pra.

Ka la ong ruh ba ki kharkhana pynmih dewbilat kiba treikam bha mynta ki don haduh 8 tylli hapoh East Jaintia Hills District, tang ia kine kiba lah don lypa ruh lah iohi shai ba ki la dep ban pynjot bad pynjakhlia ia ka mei mariang bad nalor kata ka jingkyrduh kam ka dang kiew na kawei ka por sha kawei pat. Kumta kan ym don jingmyntoi ban wanrah shuh shuh ne pynbun ia ki kharkhana pynmih dewbilat namar la dep sakhi ia ki jingeh kiba laiphew jait lai phew rukom.

“Ha ka thungkam thungjam ruh ki dang bun ki bar jylla ban ia ki trai jylla, bad haba bun na ki kam ba ki briew jong ngi ki lah ban trei hynrei kine ki kharkhana ki wanrah pynban da ki bar jylla kaba long kum ka jingleh ibein ia ka hok ka jong ngi,” bynrap ka Seng.

Nalor kata ka Seng ka la ong ruh katba dang iaid ki sngi ka jingkyrduh ka umbam umdih khamtam ha ka por aiom tlang ka long kaba shyrkhei namar ym don wah ym don khlaw shuh bad da ki phew jait ki jait jingpang ki la nang kharoi, ka jingshit ruh ka dang iai kiew katba nangmih ki sngi ki snem.

Kumta, na ka liang ka seng ka pyrshah jur ia kane ka Public Hearing jong ka Meghatop Cement Pvt Limited, ka maham ruh ia ka sorkar ba ym dei shuh ban ai jingbit ia kino kino kiba thmu ban tei karkhana pynmih dewbilat hapoh East Jaintia bad ka sorkar ka dei ban pynsangeh noh ia kane ka Public Hearing.

Ka HITO Narpuh Circle, kala ong, “Ngi tip ba don ki katto katne kiba kyrshan bad don ruh kiba pyrshah, hynrei ka jingpyrshah ka jong ngi (HITO) kam dei ba ngi shun ia ka ja kpoh jongno re jongno, ka jingpyrshah jong ngi hi kadei beit katkum kine ki mat ba la kdew.”

Ka jingdon ki cement factory kala wanrah iaka jingjaklia ka mariang bad la dap satang ki pum pum hapoh shnong hapoh thaw hapoh iing hapoh sem te kan bha ba ka sorkar kan wanrah da ka Training Centre ha East Jaintia Hills ha ka jaka kine ki kharkhana pynmih dewbilat. Ha kane ka training centre dei ban don ka Electrical, Mechanical, Automobile bad ki Computer Courses khnang ba ki samla kin ioh pyntbit ialade ha kaba kin apply kam ruh ha kine ki Cement Factory. Kum ka jingai jingmut ruh ia ka sorkar, ia kane ka Training Centre dei ban tei bad siew hi ia ka jinglut jingsep da kine Cement Factory kiba la don lypa ha East Jaintia Hills District.