Pyrshah jur ka HNYF ia ka jingthmu ka CWC ban pynmih jingiakynad jaidbynriew na ka jingjia ha Ichamati

Syllad | The Rising MeghalayaApril 1, 2024

Ka Seng Hynniewtrep National Youth Front (HNYF) hynne ka sngi U Blei ka la kynthoh tyngeh ia ka Coordination and Welfare Committee (CWC) halor ka jingkynnoh khlem nongrim da ka jingthmu ban wanrah ia ka jingiakynad jaidbynriew namar ka jingjia shah pyniap jong ki arngut ki bar jylla ha Ichamati, Shella Block, East Khasi Hills ha kine ki khyndiat sngi ba la dep.

Ka Seng ha u kyrwoh lyngba u President u Bah Sadon Blah ka la ong, “Katba ki bor pulit ki dang pynlong ia ka jingtohkit halor kane ka jingjia hynrei kumno kane ka CWC kan tei pop beit beit ia ka KSU halor katei ka jingjia shah pyniap jong kitei ki arngut ki bar Jylla ia kiba la tip kum u Esan Singh bad u Sujit Dutta.”

“Ka Seng hi ka sngew ba kane ka jingleh jong kane ka Committee ka dei ka jingpyrshang ban wanrah ia ka jingiakynad jaidbynriew ia kaba ngim lah shah satia,” u la ong shuh shuh.

Nalor kata u Blah u la ong ruh ba ka jingthmu jong ka Meghalaya Linguistic Minority Forum ban pynlong ia ka jingiakhih paidbah halor katei ka jingjia ka long pynban kumba theh petrol ha ka ding kaba la klang lypa, kata da ka jingpyrshang jong ka CWC ban wanrah da ka jingsngew iapher jaidbynriew.

“Kumta na ka liang ka Seng HNYF ka pyrshah jur ia kano kano ka jingpyrshang da kiba kum kine ki kynhun ban pynmih ia ka jingiakynasd iapher jaidbynriew ha ka jylla lyngba ki jingleh jingkam ki bym shong nongrim bad ha kaba ki trai shnong riewlum kiba dei ki Khasi kim shym la pynkhihwin namar ki jingjia shah pyniap jong ki trai shnong, kata la ka long ha ki thain khappud, ka jingshah siat ha ki shipai BSF lane halor ka jingshah bom iap jong u Bah ( L) Lurshai Hynniewta,” ong utei u nongialam ka Seng.

“Katei ka jingthmu jong ka Meghalaya Linguistic Minority Forum ban pynlong ia ka jingiakhih paidbah ka dei beit ka jingkwah ban pyni bor, kata ym tang ia ka seng HNYF hynrei ia ki paid traishnong riewlum ka Jylla.Kumta, ngi la shim ia ka rai ban pynlong ia ka jingiakhih ha ka 7 tarik u Iaiong ban pynpaw pyrshah ia katei ka jingkynnoh kam pyniap briew ka bym don nongrim,” pynkut u Bah Sadon Blah.