Pyrshah jur ka HNYM ia ka jingthmu wanrah lynti rel ha Jaintia Hills, kynthoh ia ka jingkren u Myntri

Syllad | The Rising MeghalayaOctober 23, 2023

Ka HNYM West Jaiñtia Hills District kala pynpaw ba ka ieng pyrshah bad pynrem jur halor kano kano ka jingthmu ban wanrah lynti rel hapoh ka Rilum Jaintia.

Kane ka jingpynpaw jong ka HNYM ka la wan long ruh khyndiat sngi hadien ka jingkren jong u Myntri sorkar u Bah Comingone Ymbon uba dei ruh u MLA ka Raliang Constituency da kaba ong ba ka thain Jaiñtia Hills ka la donkam kyrkieh ia ka rel kit mar na ka bynta ban kham tad ki mar ki mata bad ban pynsuk ha kaba iadei bad ka kam pynkit ia u mawshun bad dewiong bad ka ban aijingmyntoi shibun ia ki paidbah ka thain. 

U samla Leoferdinand Suiam president HNYM, ha u kyrwoh ba ula phah ula buh jingkylli ia u Bah Ymbon ba hato ka jingkiewdor jong ki mar bam mardih ka dei bym don rel mo naduh bala bat ia u lakam synshar da ka MDA hapoh ka jingialam jong ka Seng NPP? Ko u paidbah phi iohi ba ka jingwan ki karkhana dewbilat (cement factory) kaei ka jingmyntoi ngi ioh?

Nalor kata ula ong ruh; “Haba ngi iohi ba ki nongtrei ha kine ki cement factory ba don ha Rilum Jaiñtia kiba bun ki dei tang  ki  bar jylla  suda, hato  kane mo kata jingmyntoi ia u paidbah jong ngi. Kumjuh ruh haba ngi iohi ha kine ki sngi ki bnai  ba la leit ki association jong ki trok kamai ki la iakhih na ka  bynta ban ioh kam ioh jam ha ka ban kit ban bah ia ki mar ki mata na cement factory hynrei la iohi pynban ba ki cement factory kila thied bad buh syndon da la ki jong ki trok ban kit ban bah ia ki mar ki mata. Hato kane mo kata ka jingmyntoi ia ka ka ri ka thaiñ jong ngi?”

Ka HNYM ka la ong ba ka jingwanrah lei lei ia ka lynti rel kan nang ktah jur shuh shuh ia u paidbah jong ka thain hi baroh kawei. Kumta ka HNYM ka pyrshah horkit hordang ia ka jingwan jong ka lynti rel katba ka sorkar India bad ka sorkar Meghalaya kim pat lah ban pyntreikam ia ka Inner Line Permit (ILP), hapoh ka jylla.

Shuh shuh ka HNYM ka buh ruh ia kane ka jingkylli ia u Bah Comingone ba balei um ju lait ang hapoh Assembly ban iakren bad iatai ia ka mat ILP, hynrei u iakren pynban ia ka lynti rel. Ka HNYM ka la ong ba ngi donkam ia ki aiñ ban iada nyngkong eh ia ka jaidbynriew Hynñiewtrep hashuwa ba ka jaidbynriew kan jah klep na ka jingwan tyllep jong ki mynder lyngba jong kata ka lynti rel.

Nalor kata ka HNYM ka pynpaw shai ba lada une u Myntri u kwah rel palat u dei ban wanrah noh kloi ia ka ILP, bad yn sa ia peit ia kata ka rel hadien la ka biang ne em ban wanrah, bad lada une u MLA bad ka NPP kin wanrah lynti rel jubor khlem ki aiñ iada kiba biang na ka bynta ka jaidbynriew ka HNYM kan ieng ialeh da kano kano ka lynti ruh khlem salia na ka bynta ban iada ia la ka jong ka jaidbynriew.