Pyrshah jur ka KHNAM halor ka jingthung ia ka Agatha kum ka Chairperson ka MSCPCR

Syllad | The Rising MeghalayaSeptember 8, 2024

Ka Khun Hynniewtrep National Awakening Movement (KHNAM) ka la pynpaw ka jingpyrshah kaba jur halor ka jingkynnoh ba ka don ka jingthmu ban thung ia ka para jong u Myntri Rangbah ka Jylla u Conrad K Sangma kaba dei ruh ka MP barim ka Tura ka Agatha K Sangma kum ka Chairperson ka Meghalaya State Commission for Protection of Child Rights (MSCPCR).

“Ka Party ka pyrshah jur halor ka jingpynpaw ia ka bor sain pyrthei da ka sorkar MDA” ong u kyrwoh lyngba u Working President ka KHNAM u Bah Thomas Passah haka 7 tarik Nailur.

“Ka jingthung ia ki Advisor, Chairman, Vice Chairman bad kiwei pat ha ka jingpynlut da ka tnad pla tyngka ka dei ka mat kaba ki paidbah ki la pynpaw ka jingsngewkhia kaba jur bad ia ka jingpyrshah. Mynta kane ka dei kawei pat ka jingthung kam thymmai kaba pyni shai kdar ba ka sorkar MDA ka dei kaba shah liang, bad kane ka jingthung kam lyngba ka jingpyndonkam ia ka bor sain pyrthei ka long ruh tang ban pynthikna ban ioh bat ia ka bor. Kane ka pynpaw ia ka rukom synshar donbor ba pura ne dictatorship,” u la ong.

Nalor kata u Bah Passah u la ong, “Ngi sngew lyngngoh ruh ban tip ba u James Sangma ruh ruh u dei u briew uba hakhmat eh halor kane ka jingshim rai ha kaba u la phah ia ka jingtyrwa lyngba ka jingthoh sha ka sorkar. Mynta kumno u riew paidbah un lah ban kren halor ka jingshim rai jong ka sorkar. Ngi tip ba kiwei pat ki seng sain pyrthei kiba don ha ka MDA kin ym pyrshah ia kum kane ka jingleh shiliang namar ma ki ruh ki ioh ia ka bhah ha ka jingthung kam sain pyrthei.”

Da kaba pynpaw ba katkum ka jingpynbna jong ka sorkar kaba 10 tarik Naitung 2013 ka kdew shai ba, “Ka Chairperson ka dei ban long ka briew kaba pawkhmat bad kaba la trei ia ki kam kiba seisoh ban kyntiew ia ka bha ka miat jong ki khynnah,” u Bah Passah u la ong, “Ngim iohi satia ba ka Agatha Sangma ka don hok ban shah thung ha kane ka kam. Ngi la sngewthuh ruh ba kum kane ka jingthung kan pynpulom ha kaba iadei bad ka bha ka miat jong ki khynnah ha ka Jylla.”