Pyrshah jur ka KSU ba ai jaka ka Sorkar ban tei mandir hajan ka ophis DC Khliehriat

Syllad | The Rising MeghalayaJuly 10, 2024

Ka Khasi Students Union (KSU) East Jaintia Hills District ka la pynpaw ka jingpyrshah kaba jur ha kaba iadei bad ka jingai jaka ka Sorkar na ka bynta ban tei ia ka jaka mane Blei jong ki Hindu (Mandir) ha ka jaka Sorkar kaba don marjan u Mot dur jong u Woh Kiang Nangbah hajan ka ophis u Deputy Commissioner, Khliehriat.

Ka Seng hapoh ka jingialam jong u President u Streamly N Suchen bad General Secretary u Kwilnis Suchiang ka la leit ban ai da ka dorkhas sha u Deputy Commissioner ka District, u Shivansh Awasthi ban pynpaw ka jingpyrshah kaba jur halor ka jingai No Objection Certificate (NOC) na ka bynta ban shna ia ka Madir ha ka jaka kaba heh 500 sqft kaba don hajan DC ophis. Nalor kata la ong ruh ba la mang tam sa 250 sqft na ka bynta ka jingshna ia ki painkhana.

Na ka liang ka Seng ka la ong ba katkum ka jingioh jingtip la shem ba kane ka jaka ba thmu ban tei Mandir ka dei tang ka jaka mane Blei ba shipor jong ki nongtrei surok. Hynrei la ong ba hadien ba kine ki nongtrei ki la leitphai noh, ki don pat ki bar jylla kiba la leit ban tei beain ia ka jaka mane Blei ia kaba la dep ban pynpra noh ha ki snem ba la dep namar ka jingtei kaba khlem da ioh jingbit.

Haba pynpaw ka jingpyrshah kaba jur ia ka jingai jingbit na ka bynta ki jingtei ha ki jaka Sorkar, ka Seng KSU ka la ong, “Ngi ngeit skhem ba kam long kaba dei na ka bynta ki riew shimet, kynhun, society lane kynhun niam ba kin ioh ia ka jingbit na ka bynta ban pyndonkam ia ka jaka sorkar na ka bynta ki jingleh niam ne ki jingdonkam shimet.”

Nalor kata ka Seng ka la ong ruh ba ka jingailad ia kane kan pynlong ruh ia kiwei pat ki kynhun bapher bapher ba kin buh ia ka jingkyrpad ban pyndonkam ia ki jaka Sorkar ha ki sngi ki por ki ban dang wan bad ka ban ktah jur ia ka jinglong jingman hapoh ka imlang ka sahlang.

Ha kajuh ka por na ka liang ki nongialam ka KSU kila pyntip ba na ka liang u DC ula mynjur ban pynsangeh noh shuwa ia kane ka jingai jingbit bad ruh ban dang wad bniah shuh shuh na ka sorkar ha kaba iadei bad kane ka phang.