Pyrshah jur ka KSU iaka sorkar halor ka rukom jied player Basketball

Syllad | The Rising MeghalayaApril 26, 2024

Ka Khasi Students Union (KSU) Sports Cell ka pyrshah jur ia ka jingshim rai jong ka Tnat Sports ka sorkar Jylla ban jied haduh hynniew ngut napdeng ki khatar ngut ki player basketball da ki bar jylla ban leit mihkhmat ia ka Meghalaya sha ka Basketball National School Games ka ban long ha Haryana.

“Napdeng ka list jong ki 12 ngut ki player, tang 5 ngut ki dei ki trai jylla katba haduh 7 ngut ki dei ki bym dei ki trai Jylla, kata ki bym dei ki Khasi ne Garo. Kane ka jingleh shiliang khmat ka sorkar jylla ia ki khynnah lehkai Khasi ka wanrah ia ka jingkylli hato ka sorkar Meghalaya ka dei ban kyntiew ia ki Khasi (Khynriam, Pnar, Bhoi, War, Maram & Lyngngam) bad Garo ne ban ai rynsan ban kyntiew ia kiwei pat ki Jaidbynriew bym dei trai shnong,” ong u Chairman ka KSU Sports Cell u Samla Eric A Nongkynrih ha u kyrwoh bala phah haka 25 tarik Iaiong.

Kumta na ka liang ka Sports Cell jong ka KSU ka pynrem jur ia kane ka jingleh bein bad jingbym khein snep jong ka sorkar Meghalaya ia ki khynnah Khasi kiba don sap bad thrang ban ia lehkai basketball. Ka KSU ka buh ruh ka jingkylli ba hato ka Meghalaya ka rhah tang ban ioh ka nam jop da kaba wanrah da ki nongialehkai ba nabar ne ka thrang ban kyntiew ia ki khynnah ka jylla khnang ba kin kiew shuh shuh ha ki jingialehkai bapher bapher.

Ka KSU ka la ong ruh ba kane ka jingleh thurmur jong ka sorkar kan pynduh mynsiem bad pynduh lad ia bun ngut ki samla kiba angnud bad don sap ban ialehkai basketball.

Ha kajuh ka por na ka liang ka Sports Cell ka KSU ka kyntu ia ki khynnah Khasi ban ym duh jingkyrmen wat hadien ba ki la shah leh meinah ha ka sorkar jylla namar ka seng kan iai wad ki lad ki lynti ban ai rynsan ia ki bad kumjuh ruh ban peit pyrman ba kin ym duh ia ka hok ka jong ki na ka sorkar.