Pyrshah jur ka TUR ia ka Policy ka Sorkar Jylla halor ki kam pathai khubor
Ka Thma U Rangli-Juki (TUR) ha ka 17 tarik Nailur kala kyntu ia ki nongpynmih khubor, ki nongthoh khubor, ki trai jong ki lad pathai khubor bad ia ki paidbah ba kin ieng pyrshah ia ka ‘Meghalaya Public Communication Policy 2024’ ba la pynmih da ka Sorkar Meghalaya lyngba ka Tnat Directorate of Information & Public Relation (DIPR) kaba la hukum ia baroh kiba thmu ban pathai khubor kin hap ban register ia lade bad ka DIPR.
“Kane ka notification ne hukum ka long kaba be ain. Kane ka hukum jong ka Sorkar Jylla ka long pyrshah ia ka hok jong ki nongshong shnong ban kren ne pynpaw laitluid bad ruh ka long pyrshah ia ka hok jong ki nongthoh khubor ne nongpynmih khubor ne ka press freedom kaba la saindur ha ka Riti Synshar ka Ri India. Nalor nangta ka policy kam dei ka Ain bad ka policy ka dei tang ki jingkdew bad kumta kam don ia ka bor jong ka Ain. Kaba sngewsih ka long ba ka Sorkar Meghalaya ka leh kum bym sngewthuh ia kata,” ong ka Nongialam ka TUR ka Kong Angela Rangad lyngba u kyrwoh.
Ka la ong ruh ba kane ka policy thymmai, ka Meghalaya Communications policy 2024 ka ai bor palat pud ia ka Sorkar ba kan thew bad rai kut tang ma ka hi ia kino ki khubor kiba mih kiba lah ban ktah ia Sorkar Jylla, ka shongsuk shong hngain, ka akor lane kaba ktah ia ka rain ka rem ki riewshimet. Kane ka Policy ka ai bor lut ia ka Sorkar Jylla ban rai bad ka lah ban long ba kum ia kane ka Jingkyrpad ba ka TUR ka phah sha ki paralok nongthoh khubor, ka Sorkar Meghalaya ka lah ban niew ba ka dei ka jingpynshit ia ki nongthoh khubor bad lad pathai khubor ban ieng pyrshah ia ka Sorkar.
Nalor kata ka Kong Angela ka la ong ruh ba ka long kaba kongsan ban pynkynmaw hangne ba ka Sorkar Pdeng ka lah hap ban pynsangeh bad buh shuwa sharud ia ka Ain rew kaba iadei bad ki kam pathai khubor ne kata ka Broadcasting Bill namar kane ruh ka ktah palat ia ka ka jinglaitluid ki nongthoh, ki nongpynmih khubor bad ki lad pathai khubor. Kumta bun kiba ieng pyrshah ia kane ka Ain rew.
“Ka long ruh kaba kyndit ba kumno ka Sorkar Jylla Meghalaya ka tuklar marwei ia kane ka subject kaba hap ha ka concurrent list ne ka thup ba ka Sorkar Pdeng ruh ka don ka bor ban thaw Ain. Kaba ma mynta ka long ba ki paidbah kiba kynthoh pyrshah ia ka jingbamsap ka Sorkar Meghalaya ha ki rynsan social media kin shah pynshitom katkum kane ka policy thymmai. Hato kane kam ktah ia ka hok ban kren laitluid?” ong kane ka nongialam ka TUR.
Shuh shuh ka la ong ba kane ka Meghalaya Communications Policy 2024 kam ktah tang ia ka hok ban kren, ban kdew laitluid bad ban thoh khubor laitluid. Hynrei ka ktah ruh ia ka hok kaba ngi ki nongshong shnong ngi ioh lyngba ka Right to Information Act 2005.
Kumta ka TUR ka kyntu bad kyrpad ia ki paralok nongthoh, nongpynmih khubor bad ki kynhun lad pathai khubor ban ieng pyrshah ia kane ka policy bad ia ka hukum jong ka Sorkar Meghalaya halor ka kam pynmih khubor.
Facebook
Instagram
Youtube
Twitter
Leave a Reply