Pyrshah jur ka VPP ban pynkylla Industrial Park iaka CTI ha Byrnihat

Syllad | The Rising MeghalayaNovember 15, 2024

Ka Voice of the People Party (VPP) ha ka jingialam u president ba Rangbah Bah Ardent Miller Basaiawmoit haka 15 tarik Naiwieng ki la leit ban jurip kynsan kynsan ia ka Conservation Training Institute (CTI) kaba don ha Byrnihat na ka bynta ban pynpaw ia ka jingpyrshah kaba jur halor ka jingthmu ba sop sop ka sorkar ban pynkylla noh sha ka Industrial Area bad ban pynkynriah noh ia katei ka ophis treikam sha Mawkhanu.

Ha kane ka jingleit jurip la don ryngkat ruh u MLA ka Mawlai u Bah Brightstar Marbaniang, u MLA ka Mawryngkneng u Bah Heavingstone Kharpran ryngkat ka jingdon lang kiwei kiwei ki nongialam ka VPP party.

Ha kane ka jingleit jurip, ha ka jingialam u Bah Ardent Miller Basaiawmoit ki la leit ban jurip kylleng ki jaka treikam bad ruh ki sawdong sawkun katei ka CTI ban wad bniah halor ka jinglong jingman katei ka jaka sorkar ba hap ha ka jingpeit ka tnad Divisional Soil and water Conservation jong ka sorkar Meghalaya.

Kumba la pynpaw da u Bah Ardent Miller Basaiawmoit haba kren sha ki lad pathai khubor, la ong ba ka party VPP horkit hordang kan nym ailad ban pynkylla ia katei ka jaka sha ka Industrial Area bad lada ka sorkar ka leh da ka bor ka party VPP ryngkat ki paidbah ruh kin hap ban pyni da ka bor.

U la iathuh ruh ba ka party ka la dep ruh ban ai da ka jingthoh sha ka sorkar ban pynshah halor kane ka jingthmu ba haduh mynta kam pat ioh ia ka jubab bad ruh na ka liang jong u ruh kum u MLA u la dep ban kren ha ingdorbar thaw ain ka sorkar ban pyrshah bad kumba long haduh mynta kim pat ioh satia kano kano ka jubab.

Ka khubor ba shai ba ka party VPP ka la pynpaw kan ieng pyrshah bad da lei lei kin nym ailad ia katei ka CTI ba kan kylla long kata ka Industrial Area bad ka VPP kan ieng pyrshah lada dei da kano kano ka lynti, ong u Bah Ardent Miller Basaiawmoit.