Pyrshah jur ki paidbah lai shnong ka Ri-Bhoi ba thmu pynkylla ia ka jaka ka CTI sha ka Industrial Estate

Syllad | The Rising MeghalayaNovember 23, 2024

Haba pynpaw ka  jingpyrshah ia jingthmu jong ka sorkar jylla ban pynkynriah ia ka Conservation Training Institute (CTI) jong ka Soil and Water Conservation sha Mawkhanu bad ban pynkylla pat ia katei ka jaka sha ka Industrial Estate, ki nongialam jong ka Joint Action Committee jong ki lai shnong kiba kynthup ia ka Umpher 12 Mer, Amphanggre bad ka Matchokkgre ha ryngkat ki spah ngut ki paidbah nongshong ha ka 22 tarik Naiwieng ki la mih paidbah ban pyrshah jur ia kane ka jingthmu jong ka sorkar da kaba kynnoh ruh ba la shu shim rai khlem ka jingpyntip ne mynjur jong ki paidbah nongshong shnong.

Ia kane ka jingiaid paidbah  la sdang naduh ka shnong Umpher bad pynkut ha phyllaw jong ka ophis ka CTI ha 12 Mer, ha kaba la wan ban ai jingkyrshan ba radbah ruh da ki kynhun sengbhalang ba kynthup naduh ka KSU, FKJGP bad RBYF, Byrnihat Citizens Forum, Garo Students Union, Ri-Bhoi Regional Unit, Byrnihat Women Society, ki khynnah skul jong ka St. Jude Secondary school Umpher. 

Ki paidbah ki la rah ruh da ki poster ban pynpaw ia ki kyntien pyrshah kaba jur bad ban pynrem ruh ia ka jingleh sopsop jong ki bor ka sorkar jylla khamtam ka jingsngap mynthi jong u Myntri Rangbah ka jylla u Conrad K Sangma halor ka jingkyrpad jong ki nongialam shnong ban shim da kiwei kiwei ki lynti halor kane ka jingthmu pynkylla jaka karkhana ha ka jaka ka CTI.

Ki nongialam kiba la ai jingkren ki la pynrem jur ia ka sorkar jylla halor kane ka rai ba sopsop ban pynkynriah ia ka CTI khlem ka jingmynjur lang jong u paidbah bad ka jingthmu ban pynkylla jaka pynmih karkhana ka ban ktah jur ia ka jingkhuid jingsuba jong ka mei mariang bad ka ban ktah ruh ia ki tyllong umbam umdih jong kine ki lai tylli ki Shnong kiba don kumba 3000 ngut ki nongshong shnong.

Nalor kata ki la pynpaw ruh ba da leilei kin ym pdiang ia kane ka rai jong ka sorkar jylla bad ban ieng pyrshah haduh ban da ioh jingjop bad kim kwah shuh ban nang iai bam ia ka jakhlia namar kumba long mynta ka thaiñ Byrnihat ka dei kaba la ioh ia ka nam kum ka thaiñ kaba jakhlia tam hapoh ka ri India bad kan sa nang jah burom shuh shuh.

Na ka liang ki nongialam ka JAC ki la ong ba ka sorkar ka dei ban sngap ia ka jingkyrpad jong ki paidbah namar ki paidbah ki don ia ka hok, bad khamtam ka jingnang pynbun ia ki karkhana kan nang ktah jur ruh ia ka koit ka khiah jong ki nongshong shnong kynthup ia ki khynnah skul.

Shuh shuh hadien ka jingiaid paidbah, ki nongialam ka JAC ki la rai ruh ban leit iakynduh ia u Myntri Rangbah ka jylla bad ruh ban ai biang da ka jingthoh halor ka rai ba la shim lyngba kane ka jingmih ki paidbah ban pyrshah ia katei ka jingthmu ka sorkar jylla.