Pyrshah jur u Bah Sanbor Shullai halor ka rai khang bam doh Masi ka Sorkar Assam

Syllad | The Rising MeghalayaDecember 7, 2024

U MLA ka BJP na South Shillong u Bah Sanbor Shullai ha ka 6 tarik Nohprah u la pynpaw ka jingpyrshah kaba jur halor ka rai jong ka Sorkar BJP ba la lamkhmat da u Himanta Biswa Sarma ban khang ia ka jingbam doh Masi ha ki jaka paidbah.

Haba kren sha ki ald pathai khubor, u Bah Sanbor u la ong ba ha kino kino ki bynta jong ka pyrthei lane hapoh ka riti synshar jong ka Ri India, kam shym la don satia ka kyndon ka ban khang pyrshah ia ka jingbam ia kano kano ka jait doh.

“Haba phi leit sha kylleng ki ri ka pyrthei, kata kum sha Bangkok, Malaysia, Indonesia, Europe bad ki ri ka dewbah Asia ki bam ruh wat ia ki bsein, ki khnai, ki khniang, nianglartham ruh hynrei kam shym la don satia kano kano ka jingkhang pyrshah. Kumta balei ka Sorkar Assam kan khang ban bam doh Masi. Nga pyrshah jur ia kane ka rai,” u la ong.

Da kaba pynpaw ba ha Meghalaya ka dei ka mon jong u paidbah, u Bah Sanbor u la ong ba dang ha kine ki ar bnai ba la dep u la bam ia ka doh ksew ha ryngkat ka kurim jong u.

“Ngi bam ia ka doh ksew. Nga ju bam doh ksew ha ka por ba nga dang khynnah samla.Mynta ruh dang ar bnai mynshuwa u paralok u la phah doh ksew bad nga la bam ei jai bad la ka kurim. Yn leh aiu?

Haba shim ia kane ka rai ka Sorkar Assam kum ka bym bha, une u MLA ka BJP u la ong, “Balei ban shu khang kynsan kynsan? Ka dei ka mon laitluid jong phi la phi kwah ban bam doh bsein ne bam doh masi.” U la kular ruh ba yn ym ailad satia da lei lei ruh ia kiba kum kine ki jingjia ba kin wan jia ha Meghalaya.

“Ngan ieng skhem, hangne kan ym wan jia.Katba u Bah Sanbor u dang im, ngan ym khang satia.Kane ka dei ka jylla kaba laitluid.Ngi lah ban bam ia ki bsein, masi, nianglartham, khniang bad kino kino katba ngi kwah. Ka Khristmas ka la wan mynta, bam lut ia kiei kiei baroh katba kwah, ka Khristmas bad Snem Thymmai ka la wan, to ngin ialehkmen.Nga ai khublei Khristmas bad Snem Thymmai ba suk ba kmen ia baroh,” u la ong.

Haba kylli, u Bah Sanbor u la ong, “Nga don hangne mynta kum u BJP Sanbor. Ka rukom treikam ka BJP jong nga ka iapher.Ha Assam ka rukom treikam ia iapher. Hangne ka dei ka BJP Sanbor.”

Ha kajuh ka por, u Bah Sanbor u pyntip ba un sa thoh sha ka Sorkar Pdeng bad ka Sorkar Assam halor kane ka bynta.

“Nga la dep pynkhreh ban phah ia ka khubor sha ka Sorkar Pdeng.Ia ka kopi yn phah ruh sha u CM ka Assam u Himanta Biswa Sarma ban pynpaw ba ngi sngewsih namar um dei satia ban leh ia kiba kum kine kiei kiei. Ngi don ia ka ain ban pyrkhing ia ki nongleh kam bymman hynrei ym ha kaba iadei bad ka bam ka dih,” u la bynrap.