Pyrshah ka EJNC iaka kharkhana saiñ rnga dewiong ha Jalaphet

Syllad | The Rising MeghalayaJuly 9, 2019

KHLIEHRIAT: Ka East Jaintia National Council (EJNC) kala pynpaw iaka sngew kyndit kaba khraw ban ioh sngew baka don ka jingthmu ban seng iaka kharkhana saiñ rnga dewiong (coke) haka shnong Jalaphet, Bri Sutnga, East Jaintia Hills District.

U paidbah jong ka shnong Jalaphet Bri Sutnga ula pyrshah ïa kane ka jingthmu hadien ba u Waheh Shnong jong ka Dorbar Shnong Jalaphet Bri Sutnga, u Ma Womly Chyrmang ula dep ai NOC ia katei ka karkhana saiñ rnga dewiong (coke) khlem ka jingtip u paid nongshong shnong, kumjuh ka executive committee jong ka Dorbar Shnong ,Jalaphet kam tip eiei halor kane bad kala pyrshah jur ïa kane ka jingleh sop sop u Waheh Chnong.

Naka liang jong ka EJNC ka pynpaw iaka jing pyrshah kaba jur halor ka jingthmu ban shna ia katei ka kharkhana saiñ rnga dewiong haka shnong Jalaphet namar ka lada iaid beit ka jingtei ïa kane ka kharkhana kan nym wanrah jing myntoi iaka imlang sahlang, hynrei ka nlong ka jingmyntoi tang jong ki katto katne ngut bad kan wanrah jingpynjulor iaka mei mariang.

U Sambormi Lyngdoh, President EJNC ula ong ba bunsien ka jingdon kine ki kharkhana hapoh ka shnong ka thaw ka ktah jur iaka koit ka khiah jong ki nongshong shnong bad ka wanrah ruh iaka jingma kaba khraw iaka lawei bad ka pateng ban wan naka jingwan buhai shnong jong ki bar jylla. Ka EJNC kyrshan ïa u paidbah ka shnong  Jalaphet Bri Sutnga bad kyntu ban ieng skhem haka nongrim ban pyrshah ia katei ka kharkhana.

Ka EJNC ka dawa naki bor pyniaid district jong ka East Jaintia Hills ban phah sangeh shwa iaka jingshna ia katei ka kharkhana bad dawa ruh ban pynlong shuwa daka public hearing shwa ban shna ia kino kino ki kharkhana bapher bapher hapoh ka district bad ka EJNC kala byrthen ba lada ka iaid beit ka jingshna ïa katei ka kharkhana kan shim da ki rai ba tyngeh.