Pyrshah ka FKGJP ïaka jingai kontrak ka MeECL sha ka company na Odisha ban pyniaid ka kam bording

Syllad | The Rising MeghalayaApril 17, 2019

SHILONG: Ka Federation of Khasi Jaintia & Garo People (FKJGP) ka la rai ban pyrshah jur halor ka jingthmu jong ka Meghalaya Energy Corporation Limited (MeECL) ban ai kontrak ia ka company na Odisha halor ki kam pynkhreh bill light bad kiwei de.

Haba iakren bad ki lad pathai khubor hadien bala wai ka jingialang jong ka Central Executive Committee jong ka Seng, u President Welbirth Ranee ula ong ba ka Seng kan thoh sha u Chairman jong ka tnat MeECL ban pynpaw ia ka jingpyrshah kaba tyngeh halor ka jingthmu ban outsource ne ai kontrak ia ka kompani FEDCO ne ka Feedback Energy Distribution Company Limited kaba na Odisha (Orissa kyrteng rim) namar kane ka sa wanrah ia ka jingduh kam duh jam kaba khraw ia ki briew jong ka jylla.

Ha kane ka jingialang, la pynrung dkhot sha ka CEC jong ka FKGJP bad kita ki long u Bah Palwanbor Syiem kum u senior Vice President,  u Bah Eldie Newton Lyngdoh kum u Vice President bad u Bah Kitboklang Nongphlang kum chief organising secretary.

Ha kawei pat ka liang, u la iathuh ba ka jingialang ka la rai ban thaw ia ka committee kaba kyrpang kaba yn khlieh da ki briew kiba tbit ha kiba bun liang ban khmih kumno ban thaw lad thaw lynti ban weng ia ka jingduh kam duh jam ha ka jylla bad katei ka komiti kan ai ia ka kaiphod jong ka sha ka Sorkar Jylla.

U President ka FKJGP ula iathuh ba ka seng kan sa rakhe ia ka jingdap 30 snem jong ka naduh ka 6 tarik u bnai Jymmang mynta u snem bad la thaw ia ka Celebration Committee kaban khlieh da u President bad u General Secretary ka Seng Kmie ban khmih ia ka jingiaid beit iaid ryntih  jong katei ka jingrakhe lyngkhuh snem.

Kiwei pat ki dkhot jong kane ka Committee kin kynthup ia u President barim jong Seng u Bah Ardent M Basaiawmoit, u la bynrap.

Ia ka prokram sngi plie yn wan iashim bynta da ar ngut ki nongialam barim jong ka Seng kata u Minister ka tnat Health u Bah A L Hek kum u kongsan bad u Bah Titos Chyne, MDC kum u symbud kongsan.  Kane ka jingrakhe kan kut ha u bnai Nohphrah mynta u snem.