Pyrshah ka FKJGP ia ka Public Hearing ban buh Cement Plant ha Wahiajer, Narpuh

Syllad | The Rising MeghalayaOctober 15, 2024

Ka Federation of Khasi Jaintia and Garo People (FKJGP) ha ka 14 tarik u Risaw ka la dawa na ka Meghalaya State Pollution Control Board (MSPCB) ba ka dei ban pynsangeh mardor ban pynlong ia ka jingpynsngew paidbah ne ‘Public Hearing’ na ka bynta ban wanrah ia ka karkhana pynmih dewbilat (Cement Plant) – ka M/s Meghatop Cement Private Limited hapoh ka shnong Wahiajer Narpuh, East Jaintia Hills.

Ha ka shithi sha u Member Secretary ka MSPCB, u president ka FKJGP East Jaintia Hills u Bah Deihok Sumer u la ong ba ka seng ka pyrshah jur ban pynlong ia kane ka public hearing ba la pynbeit ban pynlong ha ka 18 tarik mynta u bnai.

“Ngi pyrshah jur ia ka jingthmu ban pyntreikam ia ka karkhana pynmih dewbilat bathymmai kaba lah ban pynmih haduh kumba 3.3 MTPA u clinker, 2.8 MTPA ka dewbilat bad 16 MW ki waste heat recovery system ha ka shnong Wahiajer Narpuh, EJHD halor kiba bun ki daw,” ong u kyrwoh na ka Seng.

Ka Seng ka la ong ba kane ka jingthmu ban wanrah ia kane ka Cement Plant bathymmai kan ktah jur ia ka mariang bad ki sawdong sawkun namar ki la don lypa shibun tylli ki karkhana pynmih dewbilat hapoh kane ka district.

“Kine ki karkhana ki la dep ktah jur ruh ia ki tyllong um dih, ki wah bad ki dohkha dohpnat kiba don ha ki jaka um hapoh kane ka thain na ki jakhlia ba la pynmih da kine ki karkhana dewbilat, bad kumjuh ki paidbah ki la sakhi ruh ia ka jingkyrduh um kaba shyrkhei. Ki paidbah ki la sakhi ruh ia ka jingjaboh jong ka lyer bad ki pui pui kiba ki la hap ban ring mynsiem nalor ka jingsakhi ia ka jingsyllad jong ka jingshit ha ma mariang naduh kine ki khyndiat snem ba la dep namar ka jingdon jong kiba bun ki karkhana hapoh kane ka thain,” ong u president ka Seng.

Kumta u la ong ba ka Board ka dei ban pdiang ban pynsangeh ha kaba pynlong ia kane ka public hearing ha Wahiajer Narpuh.