Pyrshah ka FKJGP iaka jingthmu pyndait smart meter ha rilum Jaintia

Syllad | The Rising MeghalayaMay 18, 2021

Ka Federation of Khasi Jaintia and Garo People (FKJGP), Jaintia Hills Zone, lyngba ka khubor bala phah da u D.S.War Chief Organizing Secretary kala pynpaw iaka pyrshah jur iaka jingthmu jong ka sorkar ban iaid shakhmat ban pyndait da u smart meter ha rilum Jaintia.

Ka FKJGP kala ong ba katkum ka shithi u Assistant Executive Engineer Khliehtyrshi Distribution Sub-Division MePDCL kaba la phah sha ki waheh shnong jong ki 6tylli ki shnong kiba kynthup Ummulong, Wahiajer, Mukhla Mission, Mukhla Shohshrieh, Mukhla Umlangshor bad Lad Mukhla ula ong ba ki briew jong kompeni Satnam Global Infraproject Limited kin wan ban pyndait ia kine ki meter.

Ka FKJGP kala kynnoh ba ki paidbah nongshnong shnong kim tip ia ka duh ka dang une u smart meter bad la shu ong beit ba ki briew jong ka company kin wan ban pyndait ia u smat meter.

Ka FKJGP ka pyrshah jur halor kane ka jing thmu jong ki briew jong ka company ban wan rung sha poh shnong poh thaw bad sa kawei ruh halor ka nongrim ba ki paidbah kim pat sngewthuh halor une u smart meter.

Haka jingshisha dei ban pynsngew paidbah shuwa shaphang une u smart Meter khnang ba ki paidbah kin dup tip bad sngewthuh hynrei kaba phylla kumno ka office jong ka MePDCL ka shu phah syndon da ka shithi sha ki rangbah Shnong khlem ka jingtip ki paidbah ba bun ba lang ba kumno u trei kam, bad kan ktah bha ruh ia ki paidbah namar ba kin hap ban thied meter.

Ka FKJGP kala buh jingkylli ruh kumno yn pyndait ia une u meter haba wat tang ha ki jaka sor ruh ym pat pyntrei kam, hynrei la sdang na ki thain nyngkyndong kaba tang ka network ruh kam da biang namar ba une u meter u trei kam lyngba ka internet kumta ka buh jing eh iaki paidbah khamtam ha ki thaiñ nongkyndong.

KA FKJGP ka banjur iaki waheh shnong jong kine ki 6 tylli ki shnong kiba ka ophis kala dep ai jingtip bad kumjuh ruh ia kiwei pat ki shnong kim dei ban pdiang ia une u meter thymmai.

Ka FKJGP kala pynpaw ruh iaka jingsngewlyngngoh ba kumno ha kum kane ka por ba ki paidbah dang ia khun iakane ka khlam COVID-19, ka sorkar kala khang ban leit ban wan na kawei ka jaka sha ka wei pat hynnei kaba phylla pat ki ai lad iaki briew jong kane ka company kiba na bar ban wan rung ha manla ki thliew iing ban pyndait ia une u meter.