Pyrshah ka HBDRF ia ka jingdawa ki Karbi ban pynieng biang ia ka khyrdop lum khajna bad rejister jaka ha Khanduli

Syllad | The Rising MeghalayaJune 27, 2024

Ka Hynniewtrep Border Disputes Redressal Forum (HBDRF) ka la dawa ia ka jingtuklar lem jong u Myntri Rangbah ka Jylla u Conrad K Sangma halor ka jingkynnoh dawa jong ki Karbi lyngba ka  Socheng Amreng Border Development Committee (SABDC) na ka bynta ban register ia ki jaka bad ban pyntreikam biang ia ka khyrdop lum khajna hapoh ka shnong Khanduli, West Jaintia Hills District.

Ha ka dorkhas ba la phah sha u CM ka Jylla ha ka 26 tarik mynta u bnai, u Chairman ka Forum u Bah C Sungoh u la ong ba kane ka jingdaa jong ki Karbi lyngba ka SABDC ban pyntreikam biang ia ka khyrdop lum khajna ka kdew shai halor ka jingthmu ban kurup jaka.U la ong ruh ba ka Khanduli bad ka shnong Myn-I (Am-ih ha Karbi) kim dei satia ki jaka kiba don hapdeng ka jingiakajia bad kiba don hapoh u pud u sam ka Meghalaya.

“Kumta ngi kyntu jur ia ka Sorkar ba kan tuklar lem mardor da kaba iakren bad ka sorkar Assam halor kane ka bynta khnang ba ki briew ki jong ngi kin ioh ia la ki jong ki hok bad khnang ban pynneh ia ka shongsuk shongsain,” u la ong.

“Kumjuh ka jingdawa jong ki Karbi ban register ia kine ki jaka ki briew jong ngi sha ka Karbi Anglong Autonomous Council (KAAC) ka dei ka buit na ka bynta ban kurup ia ki jaka ki jong ngi.Ngi kwah ruh ban pynpaw shai sha ka sorkar ba ka dei ban pynshai ba ka Rtiang Sanphaw (Arting), Mookoiram Myn-I, Lakaroi ki dei kiba don hapoh u pud u sam jong ka Meghalaya khnang ba kan ym don kano kano ka jingklumar jingmut hapdeng ki nongshong shnong kiba shong ba sah ha kine ki shnong,” ong u Bah Sungoh ha ka dorkhas.

Nalor kata u la ong ruh ba ka KAAC ka la pynieng ia ka jaka lum khajna hapoh ka shnong Khanduli ha ka 15 tarik u bnai Iaiong 2023.

“Ban iada ia la u jong u pud u sam, ki nongshong shnong ka Khanduli ki la weng noh ia ka signboard jng kane ka jaka lum khajna ha ka 16 tarik u Iaiong 2023. Naduh kane ka por ka jingiakynad ka la khie ha kine ki jaka hapdeng ki Khasi Pnar bad ki Karbi. Nalor kata ki Karbi ki la khang pyrshah ia ki Khasi Pnar na Khanduli ba kin wan rep sha ki jaka rep bad ki lyngkha kba kiba don sha ki shnong Karbi bad ki paid Khasi Pnar ki la ngat ruh ha ka jingshah pakhang surok bad ha ka liang ka ioh ka kot,” u la bynrap.

U Chairman ka Forum u la ong ruh ba khnang ban lah ban pynbeit ia kane ka jinglong jingman bad ban pynneh ia ka shongsuk shongsain ha kine ki jaka, na ka liang ka sorkar Meghalaya bad Assam ki la weng noh ia katei ka khyrdop ha ka 16 tarik u Nailar 2023.

Ha kajuh ka por na ka liang u Symbud Myntri Rangbah ka Jylla u Bah Sniawbhalang Dhar abd u Myntri ka Assam u Piyush Hazarika ruh ki la pynlong ka jingleit jurip sha kane ka jaka.

“Hynrei, na ka liang ki Karbi kim shym la pdiang ne burom ia kane ka rai jong kine ki ar sorkar bad sa shisien pat ki la dawa ban pynieng biang ia ka khyrdop lum khajna ha kajuh ka jaka. Kane ka jingdawa jong ki Karbi ka long pyrshah ia ka jingshim rai jong ki ar sorkar bad ki district council bad la iohi ruh ba ki la pyrshang ban wanrah ia ka jingiapher jaidbynriew ,” u la ong shuh shuh.