Pyrshah ka HYC ba pynhiar ia ka rta thep kam Pulit ha ka Jylla, dawa pynkylla mardor

Syllad | The Rising MeghalayaMarch 15, 2024

Ka Seng Hynniewtrep Youths’ Council (HYC) ka la dawa na ka sorkar Jylla ba ka dei ban weng noh mardor ia ka jingpynbna laitkam ne advertisment ba la pynmih dang shen na ka bynta ban aplai ia ki kam ba lait ha ka Tnat Pulit ka jylla da kaba ong ba ka jingshim rai ban pynhiar ia ka rta jong ki nongaplai ka long ka bym lah ban pdiang.

Ha ka shithi ba la phah sha u Myntri Rangbah ka Jylla u Conrad K Sangma ha ka 14 tarik mynta u bnai, u president ka HYC u Bah Roy Kupar Synrem u la ong, “Ngi kyntu jur ia phi ban shim ia ki sienjam kiba donkam ban weng noh ia katei ka advertisement bad ban pyllait da kawei pat da kaba pynneh ia ka rta thung kam ka ban iahap bad kiwei pat ki Jylla jong ka ri India na ka bynta ki ST/SC.

U la ong ruh ba katkum ka advertisement ba la pynmih da ka opihis Inspector General of Police (R/PR)-Cum- Chairman, Central Recruitment Board ha ka 6 tarik mynta u bnai, ka rta na ka bynta ka kam  UB Constable/Fireman/Driver Fireman/ Fireman Mechanic/MPRO Operator/Signal Operator/ AB Constable/ Battalion Constable/ MPRO GD/ Constable Handyman bad Driver Constable ka long 18-21 snem bad ka jingkyntiew ia ka rta da 5 snem na ka bynta ki ST/SC.

“Kine ki jingpynkylla ia ka rta na ka bynta ki nong aplai ia kitei ki kam ba lait da kaba pynrit ia ka rta jong kiba lah ban aplai sha ka 21 snem rta nalor 5 snem kata 26 snem ka dei ka bym lah ban pdiang bad kane kan ktah jur ia ki samla ka jylla ki bym pat ioh kam ioh jam na kiba bun ki daw,” u la bynrap.

U la ong ruh, “Haba kiwei ki jylla jong ka ri ki dang pynneh ia ka rta haduh 30 snem tam na ka bynta ki nong aplai kiba dei ki ST/SC, Ngim lah ban sngewthuh ia ka daw balei ka sorkar jong ngi ha ka Jylla kaba bun ki ST ka la buh ia kaba kum kane ka jingpyrkhing na ka bynta ban aplai ia kitei ki kam kiba lait.”

Nalor kata u la ong ruh ba ka Jylla bad ka Ri baroh kawei ka la duh ei da 2-3 snem ka jingthep kam namar ka khlam Covid-19 bad namar kiwei pat ki daw, bad kumta na ka liang ka sorkar ka la dei ban pyrkhat lem hashwa ban wanrah ia ka polisi ban pynrit ia ka rta thep kam ha kaba kum kane ka por kaba ki samla ki dang khmih lynti bad pynkhreh ia lade ban aplai ia kiba bun ki kam kiba lait hapoh ka Tnat pulit.

“Ka jingkylli mynta ka long shano ka lawei ki samla kiba la shah pynduh noh ia ka jingthep kam ha kane ka tnat ka poi? Hato ngi kwah ia ki ba kin sakma bad ban long ka jingban khia ia ka imlang ka sahlang bad ka jylla hi baroh kawei? Hato ngi la pynduh lad ia ki da kaba wanrah ia ki kyndon bad ki polisi kiba kum kine,” ong shuh shuh utei u nongialam ka HYC.