Pyrshah ka JSU halor ka jingplie ïaka khaii bar ri hapdeng ka India Bangladesh

Syllad | The Rising MeghalayaJune 4, 2020

Ka JSU- WJC ka pyrshah jur ia ka jingplie ka sorkar jylla iaka jingkhaii bar ri hapdeng ka India bad Bangladesh. Ka JSU kala ong ba katkum ka jingtip ba ka iohlum ba mynta ka Bangladesh ka don ha ka jingma namar ka jingkiew ka khlam jingpang Covid-19.

“Lada ka jingkhaii ka bteng kum ba ju long, khlem pep kan sa wanrah ia ka jingpur sted une u khniang sha Meghalaya,” ong u president ka War Jaintia Circle, u Eddy Kery Pohtam

Ka JSU – WJC kala pan jingshai na ka sorkar jylla ba hato ka jingkhaii lyngba ki land custom kan don ne em ki lad iada ia ki driver bad ki nongtrei ha border. Namar wat ki driver ruh kin sheptieng ban leit buh mar khlem da biang ki jingpyrkhing na baroh ar liang u pud.

Ka JSU ka ban jur ba ka sorkar kadei ban pynbiang shuwa iaki lad jingiada kumba la bthah ka koit ka khiah ban lait na ka jingeh bad ban tem iaka jingpur ka khlam.

Ka JSU-WJC kala pynpaw ba kan nym pdiang ia kane ka jingshah ka sorkar katba ym pat lah ban pynbiang iaki jingdonkam ban teh lakam iaka jingpur ka khlam ha Custom bad ka jaka rung jaka mih. “Ngi pyrshah jur khamtam ia ka jingrung ki mar na Bangladesh. Ngim kwah ruh ban don ka jingiakynduh ki briew na India bad Bangladesh.” ong u President ka War Jaintia Circle, u Eddy Kery Pohtam bad bynrap ka daw ba ki pyrshah kadei bym biang ki jaka sumar ha kane ka jylla bad bym thikna ki lad jingiarap iaki briew kiba ioh ia kane ka jingpang.