Pyrshah ka Karbi Students’ Association ba iakhun MDC elekshon ka kong Banikas kaba na ka shnong Mowlber kaba hap haka jingkhajia pud

Syllad | The Rising MeghalayaFebruary 10, 2025

Ka seng Karbi Students’ Association (KSA) kala pynpaw iaka jingpyrshah kaba jur iaka jingiakhun elekshon MDC ka Kong Banikas Laban sha ka iing dorbar thawain jong ka Jaintia Hills Autonomous District Council (JHADC) namar ba ka dei na ka shnong Mowlber ka shnong kaba hap haka jingiakhajia pud hapdeng ka Assam bad Meghalaya.

Kane ka jingaireng ka Kong Banikas ha kane ka elekshon MDC kala pynkhih win iaki nongshong shnong ka thain Karbi Anglong bad pynpaw iaka jingpyrshah kaba jur, khamtam na ka liang ka seng KSA.

Ka seng KSA ka la ong ba kam lah ban pdiang da lei lei ruh halor ka jinglong kyrtong jong ka Kong Banikas namar ba ka dei ka nongshong shnong jong ka West Karbi Anglong District bad kumno ka leit iakhun ha ka elekshon MDC ka JHADC bala pynlong da ka Jylla Meghalaya.

Ka Kong Banikas kaba dei ka nongshong shnong jong ka Shnong Mowlber kaba hap hapoh Block-I hapoh West Jaintia Hills District, katba ki KSA ki kam bad ka shnong Mowlber ha hapoh West Karbi Anglong District namar katkum ka jingkam jong ki u pud u sam jong ka West Karbi Anglong District ka kut haduh ha Wah Myntang.

Kumba yn shu pynkynmaw ka 7 tarik Rymphang, ki nongshong shnong Karbi ki la khanglad lynti ia ka Kong Banikas Laban bad ka kynhun jong ka ha ka por ba ka poi ha ka shnong Umkhyrmi bad ki Karbi ki kylli balei ki leit ialap elekshon na ka shnong jong ki kaba hap hapoh West Karbi Anglong District, Assam. Ki la ong ruh ia ka Kong Laban ba ka dei ban shim jingbit shwa na ki bor pyniaid jong ka West Karbi Anglong District shwa ba kan iai lynti na ka shnong jong ki.