Pyrshah ka KHNAM ia ka hukum ka Sorkar ban ym shah rung shapoh Secretariat khlem jingbit

Syllad | The Rising MeghalayaMarch 28, 2025

Ka Khun Hynniewtrep National Awakening Movement (KHNAM) ha ka 27 tarik Lber ka la pynpaw ka jingpyrshah kaba jur halor ka rai jong ka Sorkar ban ym shah rung shapoh Secretariat khlem da ioh shwa ia ka jingbit kaba thikna.

Lyngba u kyrwoh u Working President ka KHNAM u Bah Thomas Passah u la khot ia kane ka jingpynmih hukum ba kam dei kaei kaei ruh hynrei ka dei ka jingpyrshang ban pynkylla ia ka Secretariat sha ka ophis jong ki high level da kaba khanglad ia ki riew paidbah ba kin leit sha katei ka ophis khlem da ioh lypa ia ka jingbit kaba thikna.

“Ngi pynrem jur ia kaba kum kane ka hukum kaba pyrshang ban khanglad ia ki paidbah ba kin leit rah ia ki jingeh jong ki sha ki nongmihkhmat paidbah ne sha ka sorkar. Kumta ngi dawa na ka sorkar ba ka dei ban pynkylla mardor ia kum kine ki hukum”, u la ong.

“Ngim lah ruh ban sngewthuh balei ba ka sorkar ka sheptieng haduh katne. Hato ka dei namar ba ka sorkar ka la leh ia kiei kiei ia kiba ka hap ban buhrieh ialade na ki paidbah? Kaei kaba nga dei ban leh lada nga hap ban file da ka RTI na ki Tnad bapher bapher hapoh Secretariat? Hato ka mut ba ka donkam ia nga ban pan jingbit na u Public Information Officer? Lane aiu ngi dei ban leh lada ngi dei ban phah ia kino kino ki shithi shapoh Secretariat? Ngi sngewthuh ba lada ngi pan jingmut khlem artatien ba ngin ym ioh bad lada ngi ioh kan long hadien ba ngi la ap bun bun bnai. Kum ka party ngi la pan ban iakynduh bad u Myntri Rangbah ka jylla ha kine ki san snem kiba la leit noh, hynrei haduh mynta ngim pat shym la ioh satia,” ong u Bah Thomas Passah.

Une u nongialam ka KHNAM u la buh jingkylli ruh ba hato ka UDP, HSPDP bad kiwei pat kiba kyrshan ia ka sorkar MDA kin ailad ban pyntreikam ia kaba kum kane ka hukum.

Ha ka hukum ba la pynmih da u Principal Secretary incharge Secretariat Administration Department u Syed Md A Razi ha ka 25 tarik Lber ka ong ba ka la poi sha ka jingtip jong ka Tnad ba la shah ia ki briew ba kin rung shapoh Secretariat khlem da don ka jingpeit bniah kaba biang haba ki wan ban iakynduh ia ki Myntri Sorkar / Ophisar, Tnad treikam hapoh Secretariat kaba wanrah shibun ki jingbym biang ia baroh ki arliang.Kumta ban ioh run shapoh Secretariat dei ban pynshong nongrim lyngba ki jingpynbeit lypa (appointment) bad la mynjur da ki Myntri ne Ophisar kiba don bynta.

“Kumta la khang mardor ban rung shapoh Secretariat building (main building kynthup ia ka Yojana bhavan, Additional Building bad third secretariat building) khlem da ioh shwa ia ka jingbit bad jingmynjur na ki Myntri sorkar/ophisar. La bthah ia ki nongap ne receptionist ha Secretariat building ba tad hadien ba la ioh ia ka jingbit na ki Myntri sorkar ne ophisar kiba dei yn ialam lyngba ki private secretary / personal assistant jong ki Myntri / ophisar hashwa ban shah ia kiba wan iakynduh ia ki Myntri Sorkar/ ophisar,” ong ka hukum.