Pyrshah ka KHNAM ia ka jingthmu pynlong ‘Yatra’ ka Seng Hindu ha Shillong

Syllad | The Rising MeghalayaSeptember 18, 2024

Ka Khun Hynniewtrep National Awakening Movement (KHNAM) ka la dawa na ka Sorkar ba kam dei satia ban aijingbit na ka bynta ban pynlong ia ka Gau Dhwaj Sthapana Bharat Yatra ba la pynkhreh da ka Seng Hindu ban pynlong ha ka 2 tarik u Risaw ha ka nongbah Shillong.

Ha ka shithi sha u Myntri Rangbah ka Jylla u Conrad K Sangma, u Working President ka KHNAM u Bah Thomas Passah u la ong, “Kumta ruh da kaba phaikhmat ia ka jingsngew jong u paidbah babun balang bad ban khanglad na kano kano ka jingmih jong ka jingsngew iapher jaidbynriew ha ka Jylla, ngi kyntu ia ka sorkar Jylla lyngba ka ophis jong phi ban pynthikna ban ym shah da lei lei ruh ia ka jingthmu ban pynlong ia kane ka yatra da kino kino ki briew ne kynhun.”

“Ka jingshim jong ka sorkar ia ki lad jingiada ban khanglad ia kaba kum kane ka jingthmu pynlong yatra kan lah ban synniang na ka  bynta ban pynneh ia ka shongsuk shongsain ha ka Jylla,” u la ong.