Pyrshah ka KSU iaka jingthmu plie ban shalan mar sha Bangaladesh

Syllad | The Rising MeghalayaMay 2, 2020

Ka Khasi Students’ Union (KSU), War Jaintia Circle mynta ka sngi hapoh ka jingialam u president Laitphar Syngkrem, general secretary Lurman B Talang bad organising secretary ka district u Leningrad Tariang bad u finance secretary Kindly Khyriem la leit iakynduh ia u Deputy Commissioner, West Jaintia Hills District, u Ma Garod LSN Dykes na ka bynta ban pyrshah iaka jingthmu ka sorkar ban pynlait ne ailad ia kawei ka company York Print Pvt. Ltd. ban shalan ia ki mar ki mata na Deoduar, Kamrup lyngba ka jylla jong ngi ban pynpoi sha Bangladesh na ka kad khaii Tamabil Check Point, Dawki.

Ka KSU kala pynpaw ia ka jingpyrshah jur halor kane ka jingthmu ban pyllait iaka khaii bar ri bad ka ri Bangladesh lyngba ka kad khaii na Tamabil bad kila ai ruh da ka dorkhat ha u Deputy Commissioner ban pynpaw ka jingpyrshah namar ba ka khlam jingpang COVID-19.

Kila pynpaw ruh namar kane ka khlam la jan baroh kawei ka Ri ki khang pyrshah ia ki kali ban iaid kulmar bad ka Assam haduh mynta namar ba ki dang don kiba ioh ia une u khniang jingpang bad kan ap jingma lada wan ki briew kiba kiba na bar.

Ka KSU kala kam ba ka iohi ruh ha kine ki por ba la dep wat hapdeng ka jingkhang lad ia ki briew ba nabar ban wan rung shapoh ka jylla, hynrei ki dang don hi ba wan namar bym biang ka tlot ka jingkhynra bha ia ki kali motor ba iaid ba ieng.

Ka KSU a pynrem jur ruh namar ka sorkar kam shym lah ban batai bha katkum ka shithi ki mar ki mata aiu kita bad balei ba ym long mo ban sangeh shwa kat bym pat khuid bha une u khniang jingpang.

Ka KSU ka kyntu ia ka Sorkar Jylla ba kadei ban pynsangeh mardor ia kane ka kam khnang ba kan ym don ka jingthud ha ka imlang sahlang bad ka dei ruh ban pyrkhat bha shwa ban issue kum kine ki order.