Pyrshah ka KSU iaka jingthmu shna Police Out Post ka Assam ha Khatkasla

Syllad | The Rising MeghalayaJune 2, 2019

JOWAI: Ka Khasi Students’ Union, Laskein Circle haka sngi Saitjaiñ ka la hiar sha ka shnong Khatkasla ka shnong hadien ba kala ioh jingtip ba ka Sorkar Assam kala thmu ban shna ïaka Police Outpost hajan katei ka shnong.

Haka jingleit jurip jong ka KSU kala lap ba ka don shisha ka jingthmu jong ka Sorkar Assam ban shna Police Outpost haka wei ka jaka kaba dei ka khlaw shnong jong ka Shnong Khatkasla bad Shnong Psiar. La lap ba ka Sorkar Assam kala dep ban pynmadan iakatei ka jaka daka puh shilum naka bynta ban shna iaka Police Outpost jong ka Assam.

President jong ka KSU Laskein Circle, u Balawan Suchiang ula ong ba ka seng ka pynpaw iaka jingpyrshah kaba jur halor katei ka jingthmu jong ka Sorkar Assam ban shna Police Outpost ha katei ka jaka kaba dang hap hapoh u pud u sam ka Meghalaya.

Ka KSU kan nym shongkli kti halor katei ka kam kyntu pud u Assam bad la pynpaw ba kin leit ban dawa na ka sorkar jylla ban dawa ban tuklar bad phah pynsangeh shisyndon ia katei ka jingthmu ka Sorkar Assam.

U Balawan ula kren bynniaw ruh halor ka jingbynshimkhia jong ka Sorkar Jylla ban pynbeit ia u pud u sam bad ka jingbym shimkhia jong ka ban buh ïaka ktem pulit sha ki jaka khappud ban iada ïa u pud u sam bad u paidbah ba shong ha khappud.

Kumban shu pynkynmaw ba ha u snem bala dep haka 29 tarik u Kyllalyngkot 2018 ruh ka sorkar Assam ka thmu ban shna out post ha katei ka jaka. Ka bor District jong ka West Jaiñtia Hill kala leit ban pynsangeh bad ka jingthmu jong ka Assam kala pulom.