Pyrshah ka Ladthadlaboh iaka jingpynkynriah iaka PWD North Jowai Division

Syllad | The Rising MeghalayaNovember 4, 2020

Ka Dorbar Shnong Ladthadlaboh kala pynpaw ka jingpyrshah kaba jur halor ka jingpynbna jong ka sorkar ban pynkynriah iaka ophis PWD North Jowai Division na Jowai sha Shangpung.

Ka sorkar Jylla kala pymih ka jingpynbna haka sngi ba ar ban pynkynriah iaka North Jowai Division na Jowai sha Shangpung.

Katkum ka jingynbna No.PW/Admn/39/2015/144 bad No.PW/Admn/39/2015/144-A ka tnad PWD kala ioh ka jingmynjur na u Lat ka Jylla ban pynkynriah bad ban pynkylla kyrteng iaka Head Quarter jong ka PWD Roads, North Jowai Division na Jowai sha Shangpung. U Lat ka Jylla u mynjur ruh ban pynkylla kyrteng iaka North Jowai Division, Jowai kum ka Shangpung Division, Shangpung,

U LD Lakiang, Waheh Shnong Ladthadlaboh ula ong ka sorkar ka dei ban pyndam mardor iaka jingpynbna ban pynkynriah ia kane ka ophis bad kyrpad iaka sorkar Jylla ban pyndam iaka jingpynbna ban pynkynriah iaka PWD (Rds) North Division Jowai sha Shangpung namar kam nym ai jingmyntoi eiei iaka tnad, hynrei kan wanrah ka jingthud haka jingtreikam ka tnad.

Ka PWD North Jowai Division ka ai jingshakri ym tang iaki shnong kiba hap hapoh ka Laskein C&RD Block bad ka Shangpung, hynrei dang bun kiwei pat ki shnong kiba ha Thadlaskein Block kiba hap hapoh ka jingpeit ka North Jowai Division, la ong u ma Lakiang.

Pynbna ka sorkar Jylla ban pynkynriah iaka North Jowai Division sha Shangpung, pyrshah u ma Andrew Shullai

Ula ong ruh ba ka shnong kan sa ai ka dorkhat sha u DC West Jaintia Hills.

“Ngi dawa naka sorkar jylla ba kam dei ban pynkynriah iakatei ka Division bad lada ka sorkar ka kwah ban pynjan iaka tnad sha katei ka Block ka dei ban kyntiew kyrdan ia ka Shangpung Sub Division bad ym dei ban pynkynriah ia kaba don ha Jowai ban myntoilang u paidbah, kontrak bad ka tnad salonsar,” ong u waheh shhnong Ladthadlaboh.