Pyrshah ka MPCA iaka jingpyniasoh iaka Aadhaar bad ka EPIC

Syllad | The Rising MeghalayaDecember 22, 2021

Ka Meghalaya Peoples Committee on Aadhaar ka pyrshah jur halor ka aiῆ election kaba thymmai lane ka Election Laws Amendment 2021. Dang shen ka Sorkar Pdeng ka la wanrah ia ka Election Laws Amendment 2021 bad ba ki Їingdorbar Thaw Aiῆ ka Ri, ka Loksabha bad Rajya Sabha ki la pdiang bad mynjur. Kane ka aiῆ election kaba thymmai ka shah ban pynїasoh ia u Aadhaar number bad ka kyrteng thep vote lane ka Voter ID jong ngi ki trai shnong ka Ri India.

U Rev Kyrsoibor Pyrtuh u dkhot jong ka MPCA ula ong ba kane ka aiῆ election kaba thymmai ka buh ia ki nongthep vote kiba long ki trai shnong jong ka Ri India ha ka jingma kaba khraw. Ka jingleh jong ka Sorkar Pdeng ka long ka bym don nongrim ha ka Riti Synshar.

Naduh kaba sdang hi ka kynhun MPCA ka la pyrshah jur ia ka jingpyntreikam ia ka scheme Aadhaar bad ka Aadhaar Act 2016 halor ka nongrim ba ka aiῆ Aadhaar ka tuh bad pynduh noh ia ka hok tynrai jong ki nongshong shnong ban im jar jar marwei shimet lane ka Right to Privacy. Mynta sa kane ka aiῆ election kaba thymmai kaba shah ban pynїasoh ia u Aadhaar number bad ka kyrteng thep vote kan tuh bad pynduh noh ruh ia ka hok jong ki trai shnong ban thep vote. Dang shen ka Jylla Telengana lyngba ka State Election Commission ki la pyrshang ban pynїasoh ia u Aadhaar number bad ka kyrteng thep vote bad la shem ba kumba 2.2 million ngut ki kyrteng thep vote ki la jah rngai bad kawei na ki kyrteng kaba pawnam kaba jah ka dei ka kyrteng jong ka Nongїaleh Badminton kaba pawnam ka Jwala Gutta.

Ka MPCA kala ong ba wat u Justice Srikrishna u khlieh duh jong ka Data Protection Commission u la ong ba ka jingpynїasoh ia u Aadhaar number bad ka kyrteng thep vote ka long kaba ma bad ka buh jingma ia ki trai shnong bad ha Ri India ngim pat don ia ka Data Protection Law ne ki aiῆ ki ban iada ia ki jingtip shaphang ialade shimet ba ngi ai sha ki jaka treikam sorkar, ki bank bad kiwei de.

Ka jingpynїasoh ia u Aadhaar number bad ka kyrteng thep vote kan ailad ia ki briew kiba shu wan shong wan sah ne ki resident ban long ki trai shnong ne ki citizen. Kane kan buh jingeh hadien habud bad kha makha ki briew kiba shu wan shong kin kylla long ki trai shnong, nalor ba ka la don lypa ruh sa ka Citizenship Amendment Act kaba la long lypa ka jingma ia ka Ri bad ka Jylla, la ong ka MPCA.

Kumta na ka liang ka MPCA ka pyrshah jur bad kyntu ia ki nongshong shnong ban їakren їatai bniah halor kane bad ka kynhun kan thaw ki lad ki lynti ban їeng pyrshah ia kane ka aiῆ election kaba thym mai katkum ka Riti Synshar.