Pyrshah ka RUDS iaka Public Hearing pynheh par mawshun ka Star Cement

Syllad | The Rising MeghalayaJanuary 14, 2020

KHLIEHRIAT: Ka Rural & Urban Development Society (RUDS), East Jaintia Hills District ka long kawei na ki Seng treimon sngewbha kaba trei naka bynta ka bha ka mait bad ka roi ka par jong ki nongkyndong bad sor hapoh ka district kala iengskhem halor ka nongrim ban pyrshah jur biang ia ka public hearing jong ka kharkhana dewbilat ka Star Cement halor ka jingthmu jong ka ban pynheh iaka par mawshun ha ka shnong Brishyrnot, Elaka Narpuh, East Jaintia Hills District.

Ka RUDS ka pyrshah jur ia ka public hearing halor kine ki mat:

1. Ka jaka kaba thmu ban tih mawshun ka company ka iajan bha bad ka Narpuh Wildlife Sanctuary bad kane ka jaka hap hapoh ka Eco-sensitive zone.
2. Kane ka jaka ba thmu tih mawshun ruh ka iajan bha bad ka wah Lukha bad kane kan sa ktah bha ia ki jingim ba don hapoh um.
3. Kane ka jaka ba thmu ban tih mawshun ka jan bha bad ki jaka sah ki briew. Bad kane kan sa ktah ia ka koit ka khiah jong ki briew ha kane ka jaka khamtam lyngba ki pum pum kan sa ktah ia ka jingring mynsien jong ki.
4. Kane ka company kam shym la iaid lane bud ryntih ia ki soskular haka ka por ba iasoi kum ka kam thungkam thungjam jong ki trai shnong ne nongshong shnong ka elaka baroh kawei.
5. Kane ka company kam shym la ai jingmyntoi ia ki trai shnong, hynrei ka wanrah pynban tang ka jingpynjot ia ka sawdong sawkun ka mariang.

Halor kane ka nongrim ka RUDS katkum u kyrwoh bala phah u Haranki Syrti, president RUDS ula pynpaw ba kala dep ai jingthoh iaka jingpyrshah ia kane ka jingthmu kane ka kharkhana dewbilat ban pynheh ia ka par mawshun sha ka Meghalaya State Pollution Control Board (MSPCB), Shillong bad la kyrpad ban pynsangeh ia kane ka Public Hearing.