Pyrshah ka Seinraij Jowai ba thmu pynlong da ka jingleh niam Khristan ha ka jingplie iaka State University

Syllad | The Rising MeghalayaJanuary 7, 2025

Ka Seinraij Jowai ha ka 6 tarik Kyllalyngkot ka la kyrpad ia u Myntri Rangbah ka Jylla u Conrad K Sangma ba un tuklar lem ha kaba iadei bad ka jingthmu jong ka Sorkar ban pynlong da ka jingkyntang niam Khristan kaba heh ha ka jingplie ia ka Williamson Sangma State University ka ban long ha ka 13 tarik Kyllalyngkot.

U President ka Seinraij Jowai u Bah Hercules Toi ha ka u la ong, “Ngi pyrto ia ki sienjam ha kaba iadei bad ka jingkyntiew ia ka pule puthi ha ka jylla khamtam ha kaba seng ia ka skulbah kaba nyngkong eh jong ka sorkar Jylla, ka Captain Williamson Sangma State University. Ngi da sngewkmen shibun ia ka jingpynbna, hynrei ngi sngew ba ngi la shah shukor hadien ba ngi la ioh jingtip ba ka sorkar ka don ia ka jingthmu ban pynlong da ka jingleh niam Khristan kaba heh bha kum ka jingpynkyntang ia kane ka skulbah ha ka 13 tarik mynta u bnai kumba la pynpaw da u Myntri ka Tnad pule puthi u Rakkam A Sangma (“Lada lah ban kyrkhu ia ka Parliament da ki jingleh niam Hindu balei ym leh niam Khristan ha ka Jylla Khristan”).”

“Hynrei, ka jingkren jong u Myntri ka la pynkhein ia ka jinglong jong ka Riti Synshar Ri kaba don shibun ki jingiapher bad kumjuh ruh ha Meghalaya watla ka dei ka jylla kaba rit. Ka jingkren ba la kdew da u Myntri ba don ka jingkitkhlieh jong ka Sorkar Meghalaya ka dei ka jingpyrshang ban thaw ia ka jingiapher jaidbynriew ha ka ka jylla Meghalaya ban pynkhein ia ka kyndon jong ka hok jong ka jingngeit niam ba laitluid kaba don hapoh ka Article 25 bad 26 jong ka Riti Synshar Ri. Kumta ka Seinraij Jowai ka pynrem jur ia kane ka jingpyrshang jong ka Sorkar,” u la ong.

U la ong ruh “Namarkata, ngi khmih lynti da ka jingsngewrit ia ka jingiarap jong u Myntri Rangbah ba donburom halor kane ka kam da kaba pyrkhat jylliew khamtam eh ban burom ia ka jingdon jong ngi kum ka jaidbynriew kaba pdiang ia la ka jong ka Kolshor, ka Dustur bad ka Niam kaba long ka jingsarong jong kane ka ri “Ka Bri U Ynñiaw Wasa U Ynñiaw Wasung – U Hynñiaw Trep Hynñiaw Skum” bad na ka bynta ka jingmyntoi jong ka jingiatylli hapdeng ki niam bad ka jingburom markylliang hapdeng ki briew jong ka jylla bad ka ri.”

Na ka liang u Toi u la ban jur ba dei ban sngewthuh ia ka jingshisha bad ia ka histori jong ka khyndew ka shyiap hashwa ban pynbna ia ka Meghalaya kum ka “Jylla Khristan”.

Une u nongialam ka Seinraij u la ong ruh ba ha ka por shwa ka jingsynshar phareng ym shym la don kawei pat ka niam ha Meghalaya lait noh tang ka jingngeit trai ri trai muluk bad haduh kine ki sngi ngi ieng borbah ban iada, ban pynneh pynsah bad ban pdiang ia ka riti dustur, ka kolshor bad ka jingngeit jong ngi kumba la aiti da ki kpa tymmen jong ngi hapdeng ka jingiakynduh ia ki jingeh jong ka jingiaishah bad ka ki bor kiba don ha ka mishon ban pynduh jait ia kaei kaba dei jong kane ka ri lyngba ki lad bapher bapher.

Nalor kata u la pynpaw shuh shuh ba ka Sorkar kam lah ban kyntait ia ki jingshisha ba ia ka jylla Meghalaya la ithuh na ka bynta ki tamasa ba kyrpang ba la rakhe da ka jingngeit trai ri trai muluk bad ban jer tang katto katne, Ka Behdienkhlam, Ka Chad Sukra, Ka Shad Suk Mynsiem, Ka Shad Nongkrem, Ka Leh Niam Iewduh bad kiwei pat ki tamasa, namarkata ka kyntien “Ri Khristan” ka pynjah burom ia ka jinglong jong ngi hi kum ki riewngeit jong ka Jingngeit Trai Ri – Ki Khon Ka Niamtre Niam Khasi.

Da kaba pynpaw ba ka jinglaitluid ha ka jingngeit bad jingmane ka pyni ia ka lynti sha ka jinglaitluid ha ka niam, u Toi u la ong, ” Hynrei, ban pyniaid ia kano kano ka prokram ba thikna jong ka Sorkar ne wat ban pynitynnad ia ki iing ophis bad ban rakhe ia ki tamasa jong kawei ka niam kyrpang hapoh ki jaka ophis sorkar ka long ka jinglehrain bad ka jingpynkhein ia ka hok ban ioh ia ka jinglaitluid ha ka niam.

U la kdew ruh ba ka jingpynkylla kaba 42 ia ka riti synshar ka ri India ha u snem 1976, ka pynbna ia ka ri India kum ka Secular State kaba pyni ia ka jingbym don kano kano ka Niam kaba kyrpang hapoh ka ri.

Ka rai jong ka ïingbishar ba ha khlieh duh, ka Supreme Court ha ka mukotduma jong u snem 1994 – S. R. Bommai pyrshah ïa ka Union of India ka kren shai ba “La pynskhem ba ka India ka la long kaba khlem niam naduh ba la seng ïa ka Ri ha ka 26 tarik u K’lyngkot, 1950”. Kane ka mut ba ka Sorkar kam dei ban kyntiew ia kano kano ka Niam ne ki jingleh niam kyrpang.

Ba ka jingmut jong ka Secularism ne ka jingmane ne ngeit kaba laitluit ka iadei bad ka jingshisha ba ka Jylla ka dei ban iashim bynta ha ka prokram ha ka dur kaba long pdeng bad ym dei ban kyntiew iaka jingleh niam jong kano kano ka jingngeit, namar ka pynkhein iaka Riti Synshar kaba ka kdew sha ka Article 51 – A , kata Fundamental Duties ne ki kamram kiba la pynkup bor ia u nongshong shnong ban kyntiew ia ka jingiatylli bad ka mynsiem jong ka jinglong kawei bad ban khein kor ia ka jingdon jong ka ka pateng jong ka kolshor bapher bapher jong ka ri, u la bynrap.