Pyrshah ka SHM iaka jingtohkit ka Assam halor ka jingsiat iap iaki 5 ngut ha Mukroh

Syllad | The Rising MeghalayaNovember 29, 2022

Ka Save Hynñiewtrep Mission (SHM) ne ka kynhun Iada Hynniewtrep kala pyrshah jur iaka jingtohkit wei briew ne ka One Man Inquiry Commission kaba la thung da ka sorkar Assam halor ka jingjia ha Mukroh.

Ka SHM haka jingialang thang tynshop jong u Amit Shah Home Minister ka Ri bad CM Assam bad CM ka Jylla kaba pynlong Iawmusiang haka sngi ba Ar da kawei ka sur kala rai ban pyrshah ia kane ka jingtohkit wei briew halor ka nongrim ba ka Mukroh ka hap hapoh u pud u sam ka jylla bad buh jingkylli kumno ka Assam kan wan tohkit sha kawei pat ka jylla.

Kane ka jingjia siatiap ki Pulit Assam iaki san ngut kala jia ha Lumpalang, Mukroh haka 22 tarik Naiwieng 2022. Kane ka jaka ka jngai kumba 12 KM na Mukoilum kaba hap ha West Karbi Anglong Assam. Uwei u nongtrei ka forest Assam ruh ula khlad ha kane ka jingjia.

U Sambormi Lyngdoh president EJNC ula ong kob kylla ïa u Lahkmen Rymbui ban pyni ïa la ka jingshlur kum u war Jaintia da kaba hukum ïa u DGP ka Meghalaya ban leit kem mardor ïa ki pulit bad nongtrei tnat forest ba siat ïap ïa kitei ki san ngut.

U Roykupar Synrem General Secretary HYC sengkmie ula ong ka jingjia ha Mukroh ka jia da na ka daw ka jingbym shimkhia jong kine ki lai tylli ki sorkar ha kaba ïadei bad ka kam ïakhajia pud hapdeng ka Meghalaya bad ka Assam, kaba la sahteng la bun bun snem.

Ula pynkynmaw ruh ïaka notification ba la pynbna da ka sorkar Jylla ba ïaka jingïa pynbeit pud jong ka wat kaba ar yn pyndep tang hapoh 45 sngi, hynrei mynta la 60 tam tylli ki sngi ki la ïaid bad jin bad lada ka sorkar ka bat la ka kular lehse ka jingduh noh ïaki mynsiem ba lui lui kan nym jia.

Ka SHM ka dawa ruh ba haba buh ïaki BOP ha khappud dei ban don ïaki pulit ryngkat ki tiar bad haba ai ïaka tiar ruh ai lang bad u kuli bad ka bor ban siat namar kam myntoi ban ai pulit ai suloi lada ym ai ïaki kuli bad ka bor ban siat kumba la jia hapoh Mukroh.

Ula pyntip ruh ba ka SHM kan nym shongthait bad kan ïai bteng ïa kane ka jingïakhih tad haduh ban thikna ba ki jingkular jong u Conrad K Sangma kidei ban pyndep hapoh jong ka por shwa ba ma u bad ka kynhun jong u kin leit ban ïakhun ïaka Election ha u snem 2023.

U Bandari Ryntathiang president CORP ula kynthoh ïaka sorkar MDA halor ka jingshlur jong ka ban siat ïa u briew lajong uba thiah pang ha jingthiah, katba ïaki briew kiba nabar kiba wan siat pathar ïaki briew lajong wat tang ban kem ruh kam shym la nud hynrei ka sngap jar jar haduh mynta.

U president ka JSM u Leningstar Rymbai ula ai jingmut ïaka sorkar Jylla ba kan ai noh da ka khusnam ïaki pulit jong ka Assam namar ki long ki pulit kiba shlur bad stad ban pynthame ym kum ki pulit jong ka Jylla Meghalaya kiba shlur ban siat tang ïaki briew lajong kiba thiah pang ha ïing.

U la dawa ruh ia ka Sorkar Jylla ba ka dei ban ai kam sorkar ia i wei i dkhot na man ka longiing jong kitei ki san ngut, ka jingsumar sukher kaba ei ym tang lyngba ka MHIS bad ka free education ne ka jingpynleit skul ei.

Kiwei kiba ka ai jingkren ki kynthup ia u Roamingstar Lamare Secretary ka HYC-Jaiñtia Hills bad u Lamphrang Kharbani President HANM.