Pyrshah ka shnong Nongsning iaka jingpynbeit constituency thymmai ka Delimitation Committeee ka JHADC

Syllad | The Rising MeghalayaJuly 11, 2024

Ka Dorbar shnong Nongsning kaba hap hapoh ka Elaka Sutnga, East Jaintia Hills District kala pyrshah jur iaka jingpynkynriah iaka shnong Nongsning naka 23-Rymbai Khliehriat Constituency sha ka Sutnga Nongkhlieh Constituency haka jingpynbeit thymmai iaki Constituency da ka Delimitation Committee jong ka Jaintia Hills Autonomous District Council (JHADC).

U Waheh Shnong Nongsning u Bah D. Bareh ha u kyrwoh, ula ong ba ka Dorbar shnong kaba la long haka 9 tarik Naitung ki paidbah nongshong shnong da kawei ka sur kila rai ban ieng pyrshah beit ia kane namar ba baroh shi katta ka shnong Nongsning ka hap Constituency bad ka 23-Rymbai Khliehriat Constituency bad kane ka pynsuk shisha ia ngi kum ki nongshong shnong ha ka leit ka wan, ha ki lynti syngkien.

Ka jingpynkynriah Constituency ia ngi sha kiwei pat ki Constituency ka shnong hi kam lah ban pdiang bad kane ka pynlyngoh shi katdei eh ia ngi kum ki nongshong shnong, la ong u Bah D Bareh.

Kumta ula kyrpad iaka delimitation committee ban pyneh bad pynsah iaka shnong Nongsning ha ka 23-Rymbai Khliehriat Constituency namar ba ngi kum ki nongshong shnong ngi suk ban don ha katei ka Constituency kaba ngi shait don baroh shi katta.