Pyrshah ka TUR ba thmu pynlong ka Sorkar da ka jingiaseng ban plie ia ka Skulbah Williamson Sangma State University

Syllad | The Rising MeghalayaJanuary 4, 2025

Ka Thma U Rangli-Juki (TUR) ka pynpaw ka jingpyrshah jur ia ka jingkren laplah jong u Myntri ka Tnad pule puthi u Rakkam Sangma uba la pynbna ba yn pynlong da ka jingiaseng Khristan ha ka por ba plie ia ka Skulbah kaba nyngkong jong ka Jylla, kata ka Williamson Sangma State University na ka daw ba ka Meghalaya ka dei ka Jylla Khristan.

Lyngba u kyrwoh ba la pyllait ha ka 4 tarik Kyllalyngkot ka nongialam ka TUR Kong Angela Rangad ka la ong ba kane ka jingkren jong u Myntri ka Sorkar Jylla ka long ka bym shongnia bad ka pynkheiñ ia ki kyndon bad nongrim tynrai jong ka Riti Synshar Ri ne Constitution.

Ka la ong ba ka Meghalaya ka lah ban dei ka Jylla ha kaba kiba bun ki nongshong shnong ki dei ki Khristan kiba don ha ki Balang Khristan bapher bapher bad kiba iapher kawei na kawei pat. Hynrei ka jingbun paid kam lah ban pynlong ia ka Jylla kum ka Jylla Khristan bad ym lah ban pynkylla Jylla Khristan ia ka Meghalaya halor ka nongrim jong ka jingbun paid. Ka long kaei kaei kaba bakla bad beain ban leh kumta.

“Ka Jylla bad ki tnad treikam bapher jong ka Sorkar ne ka Ri kiba don ha baroh kawei ka Ri India ki dei ki tnad ne ki bor treikam ki bym lah ban pyniasoh bad kano kano ka niam ne ka jingngeit. Kine ki dei ban trei ne pyniaid ia ki kam jong ki katkum ki kyndon jong ka Riti Synshar ka Ri India. Kumta ka jingkren jong u Rakkam Sangma ka long pyrshah ia ka Riti Synshar,” bynrap ka TUR.

Ka Tur ka la ong ba ka Skulbah jong ka Jylla ka dei kaba la seng bad bei tyngka da ka pisa paidbah bad kumta kam dei ban pyniasoh ne shah pyniaid ha kano kano ka kynhun Niam ne Balang ne jingngeit lem kumta kan ym lah satia ban ai ki jinghikai kaba laitluid sha ki samla pule bad kan ym roi ne san lano lano ruh.

Hapoh ka Jylla Meghalaya ki don shibun ki Kynhun Balang ne Seng Niam ne kynhun jingngeit bapher bapher. Kine ki Seng ne Kynhun ki la im bad san hapoh ka Jylla, kaba kynthup ia ki Niam Tynrai, kum ki Sonsarek, Niam Tre bad Niam Khasi. Ka jingkren jong u Rakkam Sangma ka dei ka jingkhein dewthala bad ka jingbymsuitniew ia kine ki Kynhun jingngeit ne Niam kiba don ki juh ki hok katkum ka Riti Synshar jong ka Ri. Ym tang katta ka wanrah ruh ia ka jingsngewiapher kaba lah ban ialam sha ka jingiapait hapoh ki jaidbynriew trai ri kiba don ha Meghalaya.

“Ka shai kum ka sngi ba ka Sorkar Pdeng hapoh ka jingialam jong ka BJP ka pyrshang ban pynsngewthuh bakla bad leh ki kam ban pyni ba kam don jingiapher lane ba kam don kano kano ka jingmynsaw ban leh ia kino kino ki kam ne ban pyniasoh ia ki kam Sorkar ne ki tnad treikam jong ka Sorkar bad ka Niam ne ki jingleh Niam jong ki heh paid Hindu,” ka la ong.

“Hooid, pyllein pyllein ngi sakhi ba ki pukir, ki lyngdoh niam jong ka Niam heh paid Hindu ki iashim bynta bad pynlong ki jingduwai ryngkat ka knia ka khriam da ka rukom jong ka Niam Hindu ha ka por ba plie ia ka iing Dorbar Thaw Ain ne ka Parliament kaba thymmai. Kane kam mut pat ba hangne ha ka Jylla Meghalaya, ka Jylla kaba bun tam ki Khristan, ngi lah ban leh kumjuh da kaba pynlong da ka jingiaseng ne jingdwai Khristan ha ka por ba plie ia ka Skulbah ne ha kiwei pat ki prokram ba pynlong da ka Sorkar. Ka ain tynrai jong ka Synshar Paidbah bad ka dak ba kum ka Jylla ngi lah ban pynpaw ba ngi la san bad khraw mynsiem ka long ba ngin kyntait ia ki kam ne ki sain pyrkhat jong ki kynhun ne ki riew shitniam, ym ban iabud ne leh kumjuh. Kaba sngewsih ka long ba u Rakkam Sangma Myntri ka Sorkar Jylla u bud thik ne pyrthuh ia kaei ba ka Sorkar BJP ka leh ha kaba ka pyrshang ban thombor da ka jingngeit ne ka niam Hindu ha kylleng ka Ri India,”  la pynpaw ka kong Angela

Nalor kata ka TUR ka pynpaw bad pynkynmaw ba u Rakkam Sangma kum u Myntri u la bam smai ban pynneh bad iada ia ka Riti Synshar bad ia ki nongrim tynrai jong ka. Kumta ka jingkren jong u ka la pynkhein ia ki kyndon ka Riti Synshar.

Ka jingthmu ban pynlong da ka jingiaseng Khristan ha ka sngi ba plie ia ka Skulbah ka dei ban sangeh shi syndon bad u Myntri u dei ban shim biang ia ki kyntien ba u la khlei bad pan map na ki nongshong shnong ka Jylla. 

Ha kajuh ka por ka TUR ka khot ka wer ia ki nongshong shnong bad kumjuh ki seng bhalang bad ki seng sain hima ban pynrem ia ka jingkren shitniam jong u Rakkam Sangma bad ba ngin iatrei lang ban iada ia ka Riti Synshar bad ki nongrim jong ka.