Pyrshah ka UHM ïaka jingthmu pyneh par mawshun ba jan ka Narpuh Wildlife Sanctuary

Syllad | The Rising MeghalayaJanuary 14, 2020

KHLIEHRIAT: Ka United Hynniewtrep Movement-Khliehriat Circle (UHM-KC) ka la pynpaw ka jingpyrshah halor ka jingthmu pynlong ïa ka jingpynsngew paidbah ka Meghalaya State Pollution Control Board (MSPCB) ban pynheh ïa ka par mawshun ka company dewbilat ka Star Cement Lumshnong ha shnong Brishyrnot ba kala jan palat bad ka Khlaw Narpuh Wildlife Sanctuary bad ka Wah Lukha.

U Romeius Dkhar general secretary UHM, ula ong “Ngim pyrshah ïa ka roi ka par, hynrei ngi shem ba katei ka jaka ne ka par tih mawshun kaba heh haduh 42.051 hectare ka jingheh ka don hajan bad ka wah Lukha, wah Lunar bad ka Narpuh Sanctuary. Lada ioh jnigbit kane ka company ban tih mawshun na kane ka jaka khlem pep kan ktah iaka jingthaw ba im haki wah bad ha khlaw Narpuh kumjuh ka koit ka khiah u briew ba sah ha jan kane ka par mawshun.”

Ka UHM kala pynpaw ba kine ki kharkhana kiba don ha Narpuh naduh ka Star Cement kim shym la ai jingmyntoi ia u luk u lak bad kila shu wan pynjulor iaka mariang bad kjit iaka spah khyndew kane ka thain Narpuh. Ha kaba iadei bad ka thungkam thungjam ruh ki trai shnong kim shym la ioh myntoi na kine ki kharkhana bad kam don jingmut ne don nongrim ban ailad ia kine ki kharkhana dewbilat ban pynheh iaka jingtih par mawshun jong ki.

Ka UHM ka kyntu iaki paidbah ban mih shakhmat ban pyrshah ia kane ka jingpynsngew paidbah khnang ba ka jingthmu ka company kan pulom.