Pyrshah ka VPP ia ka jingthmu jong ka Sorkar ban aiti ia ka jaka ba 300 akar ban pynitynnad ia ka pung Umiam
Ka Seng Voice of the People Party (VPP) ka pyrshah jur ia ka jingthmu jong ka sorkar ban aiti ia ka jaka kaba heh haduh kumba 300 akar kaba dei ka jaka jong ka tnad Forest kaba thmu na ka bynta ban pynitynnad ia ki jaka kiba don sawdong sawkun jong ka pung Umiam, Ri Bhoi District khnang ban kyntiew ia ka kam jngohkai pyrthei ha ka jylla.
Ha ka shithi ba la thoh sha u Myntri Rangbah ka jylla u Conrad K Sangma ha ka 24 tarik Naitung, u president ka VPP u bah Ardent Miller Basaiawmoit u la ong, “ka VPP ka pynpaw ka jingpyrshah kaba jur ia ka jingthmu ba dang shen jong ka sorkar ban pynitynnad bad pynroi thymmai ia ka thain hapoh bad sawdong jong ka pung Umiam ha Ri Bhoi District.”
![](https://www.syllad.com/wp-content/uploads/2024/09/JIT-Vacancy-823x1024.avif)
“Katba ka VPP kam pyrshah ia ka jingpynroi bad jingpyniar ia ka kam jngohkai pyrthei ha ka jylla Meghalaya, hynrei ngi ngeit skhem ba kum kine ki jingpynroi kim dei ban wan ha ka jingduhnong jong ka jingpynneh pynsah ia ka mariang bad ka jingbha jingmiat jong ki nongshong shnong. Ngi kyntu ia ka sorkar ban pyrkhat biang ia ka rukom treikam kaba mynta bad ban wad ki lad ki lynti kiba neh ban ioh ia ka roi ka par bad ka jingkiew ha ka kam jngohkai pyrthei,” u la bynrap.
U Bah Ardent u la ong ba watla la sngewnguh ia ka jingthmu ban kyntiew ia ka kam jngohkai pyrthei bad ka roi ka par, hynrei kane ka plan ka don katto katne ki jingduna kiba kongsan, khamtam eh ha kaba iadei bad ka jingpynneh pynsah ia ka mariang bad ka jingbha jingmiat jong ki nongshong shnong.
U la pynpaw ruh ba ka jingpyrshah jong ka Seng ka la long halor ki san tylli ki mat – ka jingpom pathar ia ki khlaw ki btap bad ka jingpynthut ia ka mariang, ka jingktah ia ka mariang jong ka pung Umiam, ka jingpynneh pynsah ia ka kam jngohkai pyrthei, ka jingktah ia ki nongshong shnong bad ki jingtei surok bad ka jingkhapngiah jong ki kali.
Nalor kata une u nongïalam ka VPP u la ong ba ka jingthmu ban ai jaka 300 akar na ka bynta ban pynitynnad ia ka pung Umiam ka lah ban wanrah ka jingma kaba khraw ia ka imlang sahlang ha ka thaiñ. Kane ka jingleh ka lah ban wanrah ia ka jingpom pathar ia ki khlaw, ka jingshah ktah jong ki jingthung jingtep bapher bapher bad kan wanrah ia ka jingtwa khyndew bad kaba lah ban ktah jur ïa ka jinglong ka um hapoh ka pung Umiam.
Ki jingtip katkum na ka histori ki pyni ba ka jylla Meghalaya ka la duh noh haduh 17,100 hectare ki jaka khlaw hapdeng u snem 2014 bad 2020. Da kaba shim ia kane ka jingpom pathar ia ki khlaw kaba shyrkhei, ka long kaba kongsan ban iada ia ki khlaw jong ngi kiba dang sah ban ia kaba pynkylla ia ki sha ki jaka jngohkai pyrthei.
U la ong ruh ba ka jingpynrung ia ki jaka ialehkai um bad ki jaka pynbyrngia kiba heh ha ki bynta ba marjan jong ka pung Umiam ka lah ban wanrah ia ka jingjaboh kaba kham jur, wat la ka don ka jingpynthikna ban pynthymmai ia ka pung. Ka jingtrei jong ki briew kaba kham bun bad ka jingjaboh kaba lah ban mih na ki lieng bad kiwei kiwei ki tiar ialehkai um ka lah ban pynduh ia kine ki jingpyrshang bad kan wanrah ia ka jingpynjot ia ka mariang.
“U la don ruh ka jingmut ba ka jingpyrkhat ban khring ia ki nongjngohkai pyrthei lyngba ki jingpynbit pynbiang kiba remdor lyngba bad ki jingshakri da ki liengsuin ka lah ban ym long kaba lah ban neh ne kaba kynthup lang ia baroh. “Kum kane ka rukom ka lah ban ym ai jingmyntoi ia ki nongshong shnong kumba ai jingmyntoi ia ki jingthmu jngohkai pyrthei kiba iadei bad ka mariang. Ka don ka jingma ba ka jingbei tyngka kaba heh ha ka kam jngohkai pyrthei kaba rem dor ka lah ban ym ai ia ka jingmyntoi ha ka liang ka ioh ka kot kaba la khmih lynti lada kam lah ban khring ia ki nongjngohkai pyrthei kiba pynlut bun kumba la thmu,” u la ong.
Haba pynpaw ba kane ka plan kaba mynta kam da pyrkhat bha ia ki jingdonkam bad ki jingeh jong ki nongshong shnong kiba sah sawdong jong ka pung Umiam, u Basaiawmoit u la ong ba kine ki jaitbynriew ki lah ban mad ia ka jingshah pynkynriah jaka ne ki jingkylla kiba khraw ha ka rukom im jong ki khlem ka jingiasyllok bad jingsiew bai lutksan kaba biang. Ka jingpynleit jingmut ha ka kam jngohkai pyrthei kaba heh ka lah ban pynjah burom ia ki nongdie jingdie ha ka thain bad ki kam rit kiba kiew mynta ha ka kam jngohkai pyrthei kaba kham suk ban ioh bad kaba iadei bad ka mang tyngka.
Shuh shuh, une u nongialam ka VPP u la ong ba ki jingtei surok kiba la don lypa ki long kiba duna bha ban kyrshan ia ka jingdheng kali kaba mynta katba u la bynrap ba ka jingpynrung shuh shuh ia ki jingdheng kali kiba iadei bad ka kam jngohkai pyrthei khlem da pynbha shuh shuh ia ki jingtei surok ka lah ban pynsniew shuh shuh ia ka jingkhapngiah bad kan wanrah ia ka jingpynjulor shuh shuh ia ki lynti surok. Ia ka jingthmu ban pynkylluid ia ka nongbah Shillong dei ban bishar bniah shwa ban pynbun shuh shuh ia ki kali kiba iadei bad ka kam jngohkai pyrthei ha katei ka thain, u la bynrap ruh.
Leave a Reply