Pyrshah ki shnong thain khappud ba shah pynhap sha ka Barato-Mukroh Constituency

Syllad | The Rising MeghalayaAugust 9, 2024

Ki hynriew tylli ki Dorbar Shnong kiba don ha ki thain khappud Assam-Meghalaya hapoh West Jaintia Hills ki la phah da ka dorkhas sha u Chief Executive Member (CEM) ka JHADC, Jowai ban pynpaw pyrshah halor ka jingpynhap ia kine ki shnong ki jong ki na ka 13 Saphai Constituency sha ka Barato- Mukroh Constituency ha ka jingphiah constituency kaba thymmai.

Ki Waheh Shnong jong kine  ki hynriew Dorbar Shnong kiba kynthup ia ka  Tum-Tum , Myntang Tiehwieh, Pdeiñlapateiñ, Khatkasla, Psiar, Mowluber, bad Moojem Pyllun, ki la pynpaw da kaba ong: “Hadien ba ngi la iohi lyngba ki kotkhubor ia ka jingphiah ia ki shnong jong ngi na ka 13 Saphai Constituency sha ka Barato- Mukroh Constituency  da kawei ka jingmut ngi la rai ban pyllong ia ka Dorbar Shnong ba kyrkieh jong baroh 6 tylli ki shnong ha ka step 8 tarik Nailar na ka bynta ban pynsngew sha ki paidbah nongshong halor katei ka jingthmu jong ka Ophis ka JHADC ban phiah ia kine ki shnong jong ngi sha ka Barato-Mukroh Constituency.” Ha kane ka dorbar da kawei ka jingmut la rai ban ieng pyrshah ia kane ka jingthmu ban phiah ia ka shnong jong ki halor kiba bun ki daw.

La pynpaw ba ka Shnong Tum-Tum, Myntang Tiehwieh, Pdeiñlapateiñ, Khatkasla, Psiar, Mowluber, bad Moojem Pyllun, kidei ki shnong kiba don ha khappud bad ka Assam bad ki dei ruh ki shnong kiba hap ha ki jaka ba ju ia kajia pud bad ka Assam. Kane ka buh jingeh iaki paidbah nong shongshnong khamtam ka buh jingma ia ki paidbah hak a leit ka wan shaduh sha ka shnong Barato ne Mukroh namar ki hap iaid lynti sha kitei ki shnong lyngba ki shnong jong ki Jaitbynriew Karbi namar ba ka ju mih ka jingiakynad man ka por.

Ka jingialang ka pynpaw ruh ba kine ki 6 shnong kidei kiba hap hapoh ka Tum Tum Polling Station bad ka don ruh palat 2000 votes. Ka jingjngai ka shnong Tum Tum na ka shnong Sahsniang ka long tang 2 Km, hynrei ka jingjngai na ka shnong Barato pat ka long palat ia ka 30 Km nalor ka lynti surok kaba sniew.

Ki la pynpaw ruh ba ka Shnong Tum-Tum, Myntang Tiehwieh, Pdeiñlapateiñ, Khatkasla, Psiar, Mowluber, bad Moojem Pyllun, ki dei ki shnong kiba don baroh shi katta bad ka 13 Saphai Constituency, hynrei ka jingjingphiah ia kine ki shnong ka dei ka buit (Preplan) ban phiah arliang ia kine ki shnong.

Shuh shuh ki la pynpaw ba katkum ka Notification ba la pynmih ha ka 4 tarik Naitung 2024 na ka bynta ka Public Hearing ia ka ban phiah iaki Constituency ka JHADC, Jowai, kine ki shnong la pynhap sha ka 14 Sahsniang – Mowkaiaw , bad kim don kano kano  ruh ka jingpyrshah halor kane, namar la pynhap ia ki bad ki shnong ki ba Marjan. Hynrei kaba phylla pat ka long ba hadien ka Public Hearing pat, la pynkylla bad pynhap jubor ia ki sha ka Barato-Mukroh Constituency. Kane ka pyni ba ka Public Hearing kam don jingmut eiei ruh.

Kumta halor kane ka bynta na ka liang kine ki 6 Dorbar Shnong ki kyntu jur ia u CEM ka JHADC ba un sngewbha ban pynneh ia kine ki shnong jong ki bad ka 13 Saphai Sahsniang Constituency khnang ba ki paidbah nongshong kin ym mad jingeh hadien habud